Zaviaršyli restaŭracyju Notr-Dama ŭ Paryžy FOTY

Adzin z samych viadomych saboraŭ u śviecie i vizitnaja kartka Paryža Notr-Dam hatovy da adkryćcia paśla razburalnaha pažaru i ramontu, jaki doŭžyŭsia bolš za piać hadoŭ. U piatnicu prezident Francyi Emanuel Makron u supravadžeńni telekamier naviedaŭ sabor, dziakujučy čamu źjavilisia pieršyja vyjavy abnoŭlenaj śviatyni, piša Bi-bi-si.

Fota: Sarah Meyssonnier/Pool via AP

Aficyjnaje adkryćcio adnoŭlenaha Notr-Dam projdzie 7 śniežnia i, jak čakajecca, budzie abstaŭlena ź vialikaj pompaj.

U tury pa sabory Makrona supravadžali jaho žonka Bryžyt i arcybiskup Paryža Łaran Ulrych.

U dzień, kali adbyŭsia pažar, prezident Francyi paabiacaŭ, što histaryčny budynak budzie całkam adnoŭleny, i adbudziecca heta padčas jaho prezidenctva. Na praciahu šmathadovych ramontnych rabot jon niekalki razoŭ naviedvaŭ budoŭlu i trymaŭ praces pad kantrolem.

Fota: Sarah Meyssonnier/Pool via AP

Vializnyja vitražnyja vokny-ružy — adna z najbolš viadomych admietnych rysaŭ paryžskaha sabora. Aryhinały ŭzychodziać da XIII stahodździa, ale da našych dzion zmahła dažyć tolki častka, mnohija vitražy byli źniščanyja padčas papiarednich pažaraŭ. Da kanca nie zrazumieła, kolki voknaŭ i ŭ jakoj stupieni paciarpieli pry apošnim pažary, ale na fota prynamsi častka ź ich vyhladaje cudoŭna.

Tamu zaviaršeńnie restaŭracyjnych rabot u termin možna ličyć vialikaj asabistaj pieramohaj Makrona. Pavodle jaho słoŭ, sabor jak byccam prydumany znoŭku i vyhladaje vielmi vielična.

Fota: Sarah Meyssonnier/Pool via AP

Restaŭracyja sabora abyšłasia krainie ŭ 700 młn jeŭra. Častku hetaj sumy dali pryvatnyja inviestary. Pa słovach architektaraŭ prajekta, dreva dla dachavych rabot, u asnoŭnym dub, źbirali z usioj Francyi. Mienavita hetaja častka chrama — dach i špil — składali najbolšuju prablemu pry adnaŭleńni. Da rabot byli pryciahnutyja 250 budaŭničych kampanij i sotni śpiecyjalistaŭ.

Fota: Sarah Meyssonnier/Pool via AP

Pažar u sabory Paryžskaj Božaj Maci adbyŭsia ŭ krasaviku 2019 hoda. Połymia źniščyła dach, hadzińniki i špil, a taksama draŭlanyja elemienty kanstrukcyi. Pažarnyja, bolš za 500 čałaviek, zmahalisia z ahniom bolš za dzieviać hadzin.

Ciapier znakamity špil Notr-Dama znoŭ uzvyšajecca nad Paryžam. Pieršapačatkova jon byŭ ustalavany ŭ XII stahodździ. Za šmatviakovuju historyju budaŭnictva i dabudoŭki chrama jon źviedaŭ šerah pieramien, u tym liku demantaž padčas Francuzskaj revalucyi i adnaŭleńnie ŭ 1860-ja hady. Jaho vyšynia — 96 mietraŭ.

Paviedamlajecca, što z dnia na dzień kiraŭnictva sabora čakaje dastaŭku mebli, zroblenaj pa śpieczamovie inviestaraŭ. Usie astatnija detali interjeru načyščanyja da blasku i hatovyja da ŭračystaha adkryćcia 7 śniežnia i da chutkich kaladnych słužbaŭ.

Kamientary da artykuła