Franak Viačorka źmieščany ŭ respublikanski vajskovy špital u Minsku
Adzin ź lideraŭ maładziožnaj arhanizacyi Partyi BNF «Moładź BNF» Franak Viačorka źmieščany ŭ respublikanski vajskovy špital u Minsku. Pra heta paviedamiŭ jaho baćka Vincuk Viačorka.
Pavodle jaho słoŭ, Franka Viačorku zabrali z vajskovaj čaści № 48694 u Mazyry, dzie małady čałaviek prachodzić terminovuju słužbu, pozna viečaram 25 lutaha. Ranicaj 26‑ha stała viadoma, što jaho dastavili ŭ Minsk.
Vincuk Viačorka miarkuje, što jaho syna pryvieźli dla ultrahukavoha abśledavańnia serca. «Kali syn lažaŭ u balnicy ŭ Mazyry z hrypam, daktary vyjavili, što ŭ jaho chvaroba serca, niesumiaščalnaja sa słužbaj u vojsku. Voś jany zaraz i vymušanyja mitusicca», — zajaviŭ Viačorka.
U lipieni 2008 hoda miedkamisija vajenkamata Savieckaha rajona Minska pryznała Franaka Viačorku niepryhodnym da vajennaj słužby pa stanie zdaroŭja. Abłasnaja miedkamisija pastaviła heta rašeńnie pad sumnieńnie. Paśla abśledavańnia ŭ vajennym špitali maładomu čałavieku była dadziena adterminoŭka ad słužby da sakavika 2009 hoda. Adnak 16 studzienia vajenkamat Savieckaha rajona Minska pryznaŭ maładziožnaha aktyvista pryhodnym da vajennaj słužby. Sud hetaha ž rajona, dzie było abskardžana rašeńnie vajenkamata, 23 studzienia pakinuŭ jaho ŭ sile. Rašeńnie suda było pryniataje pry adsutnaści Franaka i jaho advakata.