«Kali ja pračnułasia, u majoj pochvie byli dva palcy». Fihurysta Dziasiatava vinavaciać u seksualnym hvałcie

Estonskaja fihurystka Salen Mazenh śćviardžaje, što jon skarystaŭsia jaje biezdapamožnym stanam i ciškom zhvałciŭ, pakul jana była pad snatvornym.

Na zdymku źleva Salen Mazenh razam sa svaim partnioram Markam Jaŭhienijem Hajdajenkam, sprava — Izabeła Fłores razam ź Ivanam Dziasiatavym. Fota: Olimpik/NurPhoto via Getty Image, Ezra Shaw/Getty Images

Padrabiaznaści seksualnaha skandału vakoł 23-hadovaha fihurysta Ivana Dziasiatava, jaki da 2021 hoda pradstaŭlaŭ Rasiju, zatym vystupaŭ za Biełaruś, a z 2023 hoda pierajšoŭ pad ściah ZŠA, raskazvaje francuzskaje vydańnie Mediapart.

Dziasiataŭ razam sa svajoj ciapierašniaj partniorkaj pa tancach na lodzie i žonkaj Izabełaj Fłarens zavajavaŭ bronzu na turniry CS Golden Spin of Zagreb u śniežni 2023 hoda. Mienavita padčas znachodžańnia ŭ Zahrabie jon pavioŭ siabie nieprystojna adnosna svajoj kalehi — fihurystki, uradženki Francyi Salen Mazenh (Solène Mazingue), jakaja razam sa svaim partnioram pa tancach Markam Jaŭhienijem Hajdajenkam vystupaje za Estoniju. Da pačatku vajny Rasii va Ukrainie para treniravałasia ŭ Maskvie.

U vieraśni hetaha hoda 21-hadovaja Mazenh apublikavała na svajoj staroncy ŭ instahramie videa, u jakim zajaviła, što pieraniesła seksualny hvałt z boku Dziasiatava.

Posmotrieť etu publikaciju v Instagram

Publikacija ot ̀ (@solenemazingue_)

Praz dva miesiacy spartsmienka padzialiłasia padrabiaznaściami z francuzskim vydańniem.

Pa słovach dziaŭčyny, u adzin ź viečaroŭ jana razam ź Dziasiatavym i aŭstralijskaj fihurystkaj Choli Charys paviačerali ŭ restaranie hatela Westin Zagreb, u jakim spynilisia padčas spabornictvaŭ. Paśla pasiadziełak ź inšymi spartsmienami bližej da apoŭnačy Mazenh pajšła spać. Charys i Dziasiataŭ praviali dziaŭčynu da jaje numara.

Pa słovach Sałan, praz traŭmu hałavy, jakuju jana atrymała ŭ kancy 2022 hoda, u jaje jość prablemy sa snom, tamu jana pastajanna prymaje snatvornaje. Tak było i ŭ toj viečar. 

Dalej, jak śćviardžaje Mazenh, kala troch hadzin nočy jana pračnułasia, bo «adčuła niešta ŭnutry svajho cieła». «Kali ja ačomałasia, to zrazumieła, što ŭ majoj pochvie jak minimum dva palcy», — cytuje francuzskaje vydańnie słovy z zajavy spartoŭki ŭ palicejski ŭčastak Sen-Žermen-an-Le, jakuju jana padała ŭ krasaviku 2024 hoda.

Pa słovach Mazenh, pa tatuiroŭcy jana paznała Dziasiatava, jaki byŭ pobač poŭnaściu hoły. Paśla hetaha jana ŭciakła ŭ vanny pakoj i zamknułasia ŭ im. Ivan spytaŭsia, ci ŭsio ź joj u paradku, ale nie atrymaŭ adkazu. Prykładna praz hadzinu dziaŭčyna vyjšła z vannaha pakoja. Na toj čas Dziasiatava ŭ numary ŭžo nie było.

Na nastupny dzień Salen abmianiałasia ź Ivanam paviedamleńniami ŭ sacyjalnaj sietcy.

«Čamu ty apynuŭsia ŭ maim łožku?» — spytała dziaŭčyna. «Tvaje dźviery byli zakrytyja, ale nie zamknionyja. I ja nie zmoh prymusić siabie viarnucca ŭ numar», — adkazaŭ mužčyna. «Ja pamiataju, što tvaje ruki apynulisia ŭnizie. Prosta skažy praŭdu», — paprasiła Mazenh. «Ja zrabiŭ heta. A potym ty pračnułasia. Mnie škada», — adpisaŭ Dziasiataŭ. Paźniej, pa słovach dziaŭčyny, jon prapanavaŭ sustrecca ŭviečary, kab pahavaryć, ale jana admoviłasia.

Jak śćviardžaje spartsmienka, pra toje, što ź joj adbyłosia, jana raskazała byłoj estonskaj fihurystcy Emilii Arm, jakaja ciapier pracuje sudździoj. Taja paabiacała pieradać infarmacyju ŭ estonskuju fiederacyju fihurnaha katańnia. Adnak estonskaja fiederacyja, atrymaŭšy infarmacyju praz treciuju asobu, nie stała źviazvacca ź inšymi arhanizacyjami biez dazvołu samoj paciarpiełaj.

Akramia Arm, Salen raskazała pra ŭsio mamie i trenieru Mary-Frans Dziubre, jakaja, uśviedamlajučy surjoznaść situacyi, paabiacała padać skarhu ŭ fiederalnuju prahramu Skate Safe, adkaznuju za zbor paviedamleńniaŭ i śviedčańniaŭ ab seksualizavanym hvałcie, i kiraŭnictvu zbornaj ZŠA. Adnak u vyniku jana hetaha nie zrabiła. U vyniku 16 vieraśnia 2024 hoda Mazenh sama padała skarhu. Praź miesiac, 18 kastryčnika, Skate Safe adchiliła Ivana Dziasiatava ad vystupleńniaŭ za «nienaležnyja pavodziny».

Kamientary da artykuła