Syna kiraŭnika Čačni Adama Kadyrava ŭnieśli ŭ Knihu rekordaŭ Rasii
Jaho nazvali samym maładym načalnikam słužby biaśpieki kiraŭnika subjekta Rasii — hetuju pasadu jon zaniaŭ u 15-hadovym uzroście.
Adam i Ramzan Kadyravy. Fota: Ramzan Kadyraŭ / Telegram
Uznaharodžańnie adbyłosia ŭ Hroznym padčas matču MMA. Siertyfikat pieradaŭ hałoŭny redaktar knihi Stanisłaŭ Kanienka, paviedamlaje Radyjo Svaboda.
Akramia taho, Adam Kadyraŭ atrymaŭ miedal za papularyzacyju Knihi rekordaŭ Rasii — u čym zaklučajecca jaho dziejnaść pa papularyzacyi, Kanienka nie ŭdakładniŭ.
15 žniŭnia 2023 hoda ŭ Hroznym Adam Kadyraŭ źbiŭ aryštavanaha pa abvinavačvańni ŭ spaleńni Karana Mikitu Žuraŭla. Palicyja admoviłasia raspačynać spravu, bo na toj momant u syna kiraŭnika Čačni jašče nie nastupiŭ uzrost pryciahnieńnia da kryminalnaj adkaznaści — jamu było 15 hadoŭ.
Paśla hetaha Adam Kadyraŭ atrymaŭ zvańnie «hieroja Čačni», pasadu načalnika adździeła biaśpieki kiraŭnika respubliki, vyšejšyja Ordeny za zasłuhi pierad Tatarstanam, Karačajeva-Čarkiesijaj, Kabardzina-Bałkaryjaj, čačenski orden «Dajmiechkan Sij» («Honar nacyi») i relihijnyja Ordeny «Za zasłuhi pierad Umaj» i «Za słužeńnie relihii Isłam» I stupieni, miedal «Pracoŭnaja dobleść Rasii» i «Za ŭkład u raźvićcio Rasijskaha ŭniviersiteta śpiecnaza» I stupieni. Niekatoryja ź pieraličanych vyšej uznaharod jon nie mieŭ prava atrymać u siłu ŭzrostu.
Kiraŭnictva Čačni nieadnarazova i publična ŭchvalała dziejańni Adama Kadyrava. Ramzan Kadyraŭ zajaŭlaŭ, što «było b dobra», kali b jaho syn zabiŭ Žuraŭla.