«Ja šakavanaja i złaja». Skarlet Jochansan abvinavaciła OpenAI u kradziažy svajho hołasu
Halivudskaja aktrysa ź biełaruskimi karaniami Skarlet Jochansan publična zapadozryła hiendyrektara OpenAI Sema Altmana ŭ naŭmysnym kłanavańni jaje hołasu dla ahučki štučnaha intelektu (ŠI) ChatGPT i asabliva jaho novaj viersii Omni. Voś što Altman zajaviŭ u adkaz.
Halivudskaja aktrysa Skarlet Jochansan i hiendyrektar kampanii OpeanAI Sem Altman. Foty: Evan Agostini / Patrick Semansky / AP
Kamanda jurystaŭ Skarlet Jochansan nakiravała dvie skarhi ŭ kampaniju OpenAI z-za najaŭnaści ŭ niejrasietcy ChatGPT «vielmi padobnaj na hołas aktrysy» ahučki pad pracoŭnaj nazvaj Sky. Aktrysa zajaŭlaje, što ŭ minułym hiendyrektar OpenAI Sem Altman sam prasiŭ Jochansan ahučyć mienavita hety hałasavy režym, ale jana admoviłasia, piša vydańnie The Verge.
Vydańnie adznačaje, što hałasavy režym Sky (adzin z 5 asnoŭnych hałasoŭ ChatGPT) byŭ vykarystany dla demanstracyi novaj viersii niejrasietki pad nazvaj Omni, kali mienavita hetym hołasam štučny intelekt razmaŭlaŭ z karystalnikami.
Hetaja ahučka isnavała i raniej, adnak viersija Omni «napoŭniła hety hołas žyćciom i emocyjami», i jana stała vielmi padobnaja na realny hołas Skarlet Jochansan, što i vyklikała abureńnie aktrysy, zajavili ŭ kamandzie jurystaŭ Jochansan.
Akramia taho, u svajoj skarzie aktrysa namiaknuła, što ŭ Sema Altmana jość na jaje fietyš. Usia prablema ŭ filmie «Jana» («Her») 2013 hoda, jaki atrymaŭ 4 premii Oskar, dzie Skarlet Jochansan ahučyła «Samantu» — niejrasietku, ź jakoj maje znosiny hałoŭny hieroj filma.
«Samantaj» nie raz publična zachaplaŭsia Sem Altman i jon zrabiŭ heta jašče raz, kali hałasavy režym Sky tolki staŭ dastupny dla karystalnikaŭ, namiaknuŭšy na padabienstva novaha režymu z hołasam Skarlet Jochansan u filmie, kažuć jurysty aktrysy.
U svaju čarhu, Altman u adkaz na abvinavačvańni Jochansan zajaviŭ, «što hołas Sky nie źjaŭlajecca hołasam aktrysy, i jon nikoli nie chacieŭ, kab jon byŭ padobny na jaje».
«My vybrali inšaha čałavieka dla ahučvańnia Sky jašče da lubych našych kantaktaŭ ź mis Jochansan. Z-za pavahi da jaje my prypynim vykarystańnie hołasu Sky u našych praduktach. My prynosim prabačeńni Skarlet za toje, što nie zmahli dasiahnuć ź joj parazumieńnia», — adkazaŭ Sem Altman u kamientarach dla vydańnia The Verge.
U vyniku i sama kampanija OpenAI abviaściła, što «na peŭny čas prybiare hołas Sky z ChatGPT i dapracuje jaho».
Čytajcie taksama:
Majkł Duhłas i Skarlet Jochansan akazalisia dalokimi svajakami. Prodki abaich pachodziać ź Biełarusi