Viadučaja spartovych navin na BT pierajechała z mužam u Izrail

Hanna Lubiankova viała naviny sportu na «Biełaruś 5». Pracavała na chakiejnych matčach, spabornictvach pa lohkaj atletycy, viesłavańni na bajdarkach i kanoe. Kamientavała cyrymonii adkryćcia i zakryćcia Alimpijskich hulniaŭ.

Viała taksama šou «Hieroi. Pierazahruzka» na «Biełaruś 1», dzie ŭ pary ź joj była ŭnučka Alaksandra Łukašenki Darja. 

Hanna Lubiankova. Fota: archiŭ viadučaj 

Jak piša partał Tochka.by, ciapier Lubiankova pierajechała z mužam u Izrail. Hanna patłumačyła žurnalistam, što rašeńnie pierabracca ŭ Izrail paŭstała nie spantanna.

«U Jahora jaŭrejskija karani, tut žyvie jaho siastra, my nieadnarazova abmiarkoŭvali ź joj i inšymi svajakami temu repatryjacyi. Dvojčy prylatali siudy, kab pahladzieć, pahutaryć, acanić ryzyki i našy mahčymaści. Sabrali nieabchodnyja dakumienty», — patłumačyła žurnalistka.

U jaje muža, prafiesijnaha spartsmiena i treniera pa płavańni Jahora Dadoleva, jość pierśpiektyva pracaŭładkavańnia.

«Acaniŭšy spartyŭnyja dasiahnieńni, uzrovień kvalifikacyi, dyrektar kłuba adrazu ž prapanavała Jahoru pracu. Ułasna, heta i stała adnym z vyznačalnych faktaraŭ našaha pierajezdu. A ja paciahnułasia za mužam», — padzialiłasia Hanna.

Hanna Lubiankova. Fota: archiŭ viadučaj 

Pieršapačatkova muž płanavaŭ palacieć u Izrail jašče ŭ śniežni 2023 hoda, ale Hanna nastajała na tym, kab pačakać.

«Jak ja mahła kinuć lubimy bijatłon u razhar siezonu? U mianie aŭtarskaja prahrama «Ahniavy rubiež», abaviazacielstvy pierad telekanałam, fiederacyjaj, zaŭziatarami. Nielha pakidać spravy niezavieršanymi».

Ciapier muž Lubiankovaj čakaje, kab atrymać licenziju, jakaja daje prava zajmacca trenierskaj pracaj, a jana sama adpraviła reziume na ruskamoŭnuju radyjostancyju i na adzin ź miascovych telekanałaŭ.

Kamientary da artykuła