Pavodle amnistyi vyzvalenyja 2 126 čałaviek
U vyniku prymianieńnia zakona ab amnistyi, vykanańnie jakoha zavieršana 7 listapada, z zakrytych ustanoŭ Biełarusi vyzvaleny 2.126 čałaviek.
Pra heta paviedamiła načalnik śpiecyjalnaha adździeła ŭpraŭleńnia apieratyŭna‑režymnaj raboty departamienta vykanańnia pakarańniaŭ (DVP) MUS Biełarusi Žanna Baturyckaja.
U tym liku vyzvaleny 383 čałavieki, jakija adnosiacca da lhotnaj katehoryi hramadzian:
niepaŭnaletnija, ciažarnyja žančyny; mužčyny i žančyny, jakija nie znachodziacca ŭ šlubie i majuć dziaciej da 18 hadoŭ; mužčyny starejšyja za 60 hadoŭ, žančyny — za 55 hadoŭ; chvoryja na tubierkuloz, ankałahičnyja zachvorvańni i h.d.
Vyzvalenyja 58 čałaviek, asudžanych za złačynstvy, jakija nie ŭjaŭlajuć vialikaj hramadskaj niebiaśpieki, 560 — termin pakarańnia jakim nie pieravyšaŭ šaści hadoŭ i jany na momant uvachodžańnia zakona ŭ siłu adbyli jaho čverć.
Ad pakarańnia ŭ vyhladzie aryštu vyzvaleny 194 čałavieki. Taksama vyzvaleny 37 čałaviek, jakija ŭčynili złačynstva pa nieaściarožnaści. U asnoŭnym heta DTZ. Vyzvalenyja 798 čałaviek, jakim na momant razhladu materyjałaŭ zastałosia adbyć mienš čym adzin hod.
Termin źniavoleńnia na adzin hod skaročany 9.345 hramadzianam, i jany praciahvajuć adbyvać pakarańnie.
Z žanočych kałonij vypuščany 162 žančyny, dla 991 — skaročany termin na adzin hod. Ź dziciačych kałonij vyzvaleny 159 niepaŭnaletnich, 255 — skaročany termin pakarańnia na adzin hod.
U vyniku prymianieńnia amnistyja kampiensavana ŭronu, pryčynienaha złačyncami, na 5 młrd. 812 młn. 69 tys. rubloŭ. U minułuju amnistyju pamier kampiensavanaha ŭronu skłaŭ 1,5 młrd. rubloŭ. «Takim čynam, u vyniku prymianieńnia zakona ab amnistyi vyjhrali paciarpiełyja», — adznačyła Baturyckaja. Pavodle jaje słoŭ, u niekatorych vypadkach dla kampiensavańnia ŭronu svajaki asudžanych brali kredyty.
U dačynieńni da tych asudžanych, kamu było pryznačana prymusovaje lačeńnie ad ałkahalizmu abo narkamanii, zakon ab amnistyi moža być prymienieny paśla kursu lačeńnia. «Kolkaść takich asob niaznačnaja», — adznačyła pradstaŭnik DVP.
Što da praviadzieńnia amnistyi ŭ 2010 hodzie, to, pavodle słoŭ Baturyckaj, «budzie kamanda — budzie amnistyja». Pavodle jaje słoŭ, inicyjavać hetuju kampaniju mohuć MUS, Miniust abo kiraŭnik dziaržavy.