Pieravał Dziatłava aficyjna adkryjuć dla turystaŭ
U Śviardłoŭskaj vobłaści adkryjuć centr ź infrastrukturaj dla turystaŭ na pieravale Dziatłava, dzie ŭ 1959 hodzie zahadkava zahinuli dzieviać turystaŭ. Pra heta piša ura.ru, spasyłajučysia na zajavu namieśnika dyrektara Departamienta raźvićcia turyzmu Śviardłoŭskaj vobłaści Juryja Patanina.
Tajamničaja śmierć dzieviaci turystaŭ u 1959 hodzie va Uralskich harach vyklikała mnostva teoryj — ad zabojstva, učynienaha jeci, da sakretnych vajskovych ekśpierymientaŭ. Fota: Ultrasto / Shutterstock / infodjatlov.narod
Pavodle Patanina, na stvareńnie «turystyčnaj Miekki» spatrebicca ad adnaho da troch hadoŭ.
— Tam užo jość turystyčny patok, nie chapaje paru rečaŭ, jakija dazvolili b hety patok strukturavać. Taksama treba zrabić turyzm bolš kamfortnym i biaśpiečnym, — skazaŭ Patanin.
Na miescy raźmiaščeńnia turystyčnaha centra płanujuć vyrašyć prablemy z suviaźziu i zabiaśpiečyć elektryčnaściu pasiołak Vižaj, jaki znachodzicca la pieravału Dziatłava.
Zdareńnie na pieravale adbyłosia ŭ 1959 hodzie, tady zahinuła hrupa łyžnikaŭ turystyčnaha kłuba Uralskaha politechničnaha instytuta. Na ciełach turystaŭ znajšli surjoznyja traŭmy, niekatoryja z zahinułych byli raspranutymi, a ŭ adnoj z udzielnic pachodu nie było vačej. Pryčyna trahiedyi stała najvialikšaj zahadkaj u Savieckim Sajuzie.
Čytajcie taksama: