U Biełarusi za hod fiksujecca da 100 ziemlatrusaŭ
Doktar fizika-matematyčnych navuk, hałoŭny navukovy supracoŭnik Centra hieafizičnaha manitorynhu NAN Biełarusi Arkadź Aronaŭ śćviardžaje, što ŭ Biełarusi za hod moža fiksavacca da 100 ziemlatrusaŭ. Adnak jany, jak praviła, vielmi słabyja i nie majuć razburalnaha charaktaru, a ludzi ich uvohule nie adčuvajuć.
U asnoŭnym ziemlatrusy na terytoryi Biełarusi adbyvajucca ŭ rajonie Salihorska, jany vyklikanyja hornapramysłovaj dziejnaściu.
Takija ziemlatrusy charakternyja praktyčna dla ŭsich radoviščaŭ, dzie idzie aktyŭnaja zdabyča šachtavym mietadam. Jany majuć nievialikuju enierhiju, ale patrabujuć peŭnaha kantrolu.
Pavodle Arkadzia Aronava, u Biełarusi siejsmałahičnyja nazirańni pravodziacca z 1965 hoda.
«Pieršyja nazirańni byli arhanizavanyja na bazie hieafizičnaj absiervatoryi «Pleščanicy». Dalejšaje raźvićcio adbyvałasia ŭ chodzie adzinaj sistemy siejsmałahičnych nazirańniaŭ SSSR. Pry hetym asnoŭnyja etapy raźvićcia siejsmałahičnych nazirańniaŭ źviazanyja sa stvareńniem nacyjanalnaj sistemy manitorynhu navakolnaha asiarodździa, sistemy manitorynhu nadzvyčajnych situacyj pryrodnaha i technahiennaha charaktaru, a taksama budaŭnictvam Biełaruskaj AES», — dadaŭ navukoviec.