Uradženca Danbasa, jakoha Łukašenka kataŭ pa ladovaj arenie ŭ kalascy, apieryravali ŭ Minskaj abłasnoj balnicy
Učora Alaksandr Łukašenka na minskaj «Alimpik-Arenie» kataŭ u invalidnym kreśle mužčynu, jaki vajavaŭ u šerahach rasijskaj armii na vajnie va Ukrainie. Siońnia Minzdaroŭja pachvaliłasia, jak jaho ratavali.
Skryn videa
Pavieł Pracharenkaŭ, uradženiec Danbasa, spačatku słužyŭ u tak zvanaj «narodnaj milicyi DNR» — rasijskim uzbrojenym farmiravańni, što farmalna ličyłasia samastojnym. Z pačatkam poŭnamaštabnaj vajny jaho adpravili na pieradavuju.
U krasaviku 2022 hoda mužčyna padarvaŭsia na minie, straciŭ adnu nahu, ledź nie straciŭ i druhuju. Apieryravali jaho ŭ Minskaj abłasnoj kliničnaj balnicy.
Apieracyja doŭžyłasia ŭvieś dzień.
«Na siońnia pacyjent zakančvaje lačeńnie ŭ aparacie Jelizarava. Paśla čaho jon budzie pieraviedzieny na hipsavuju paviazku — heta zojmie jašče dva miesiacy. I paśla hetaha my čakajem praktyčna poŭnaha adnaŭleńnia funkcyi apieryravanaj kaniečnaści. Zatym možna budzie prystupić da pratezavańnia amputavanaj nahi», — pryvodziacca słovy doktara Alaksandra Kavalenki ŭ telehram-kanale Minzdaroŭja.