Žychara Charkava asudzili na 10 hadoŭ za prarasijskija ŭlotki
61-hadovy žychar Charkava pryznany vinavatym u supracoŭnictvie ź dziaržavaj-ahresaram i ažyćciaŭleńni supraćpraŭnaj infarmacyjnaj dziejnaści hrupaj asob pa papiaredniaj zmovie.
Jon asudžany da 10 hadoŭ źniavoleńnia z pazbaŭleńniem prava zajmać pasady, źviazanyja z vykanańniem administracyjna-haspadarčych i arhanizacyjna-rasparadčych funkcyj na 10 hadoŭ paśla vyzvaleńnia.
Imia padsudnaha nie nazyvajecca. Viadoma, što jon były mastak-pastanoŭščyk adnaho z charkaŭskich telekanałaŭ.
Jak paviedamlaje prakuratura Charkava, u sudzie było dakazana, što padsudny vyrablaŭ doma paštoŭki/ulotki z vyjavaj rasijskaj simvoliki «Z» i rasijskaha ściaha.
Zatym jon pierapraŭlaŭ svaje makiety dačce, jakaja žyvie ŭ Rasii, a taja, u svaju čarhu, praz roznyja ministerstvy sprabavała drukavać ulotki i raspaŭsiudžvać ich siarod asabistaha składu armii RF i ŭzbrojenych farmiravańniaŭ niepryznanaj «ŁDNR».
Paviedamlajecca, što havorka idzie pra tysiačy ŭlotak.
Rabiłasia heta z metaj uźniaćcia bajavoha duchu siarod rasijskich bajcoŭ, što było zaŭvažana na samym vysokim uzroŭni — u Kramli, śćviardžaje Charkaŭskaja prakuratura.
Pavodle infarmacyi Charkaŭskaha adździeła SBU, jaki ažyćciaŭlaŭ dasudovaje rasśledavańnie, pry pieratrusie ŭ abvinavačanaha znajšli savieckuju i antyŭkrainskuju litaraturu, a taksama knihu źbiehłaha Viktara Janukoviča.
U sudzie 61-hadovy mastak całkam pryznaŭ vinu.