Ustanoŭki «Petryjot» mohuć dapamahčy Ukrainie, ale źviazanyja z hetym ryzyki dla NATA
Administracyja prezidenta ZŠA Bajdena, mahčyma, pahadziłasia pieradać Ukrainie zienitnyja rakietnyja kompleksy «Petryjot», ale heta rašeńnie moža stvaryć prablemy dla abarony NATA, piša ŭ kałoncy dla brytanskaj Guardian ekśpiert Karaleŭskaha abjadnanaha instytuta abaronnych daśledavańniaŭ (RUSI) Džek Uotlinh.
Fota: AP
«Petryjot» — adna z samych mahutnych u śviecie sistem supraćpavietranaj i supraćrakietnaj abarony. <…> Akramia abarony ŭkrainskich haradoŭ, pradastaŭleńnie takich srodkaŭ SPA siaredniaj dalokaści moža taksama vyzvalić častku mahčymaściaŭ dla ŭkrainskich rakietnych sistem S-300, pašyryŭšy dastupnaje pavietranaje prykryćcio nad linijaj frontu», — piša Uotlinh.
Pry hetym jon adznačaje, što sistemy «Petryjot» nie zabiaśpiečać nieadkładnuju abaronu Ukrainy — heta składanaja sistema jak z punktu hledžańnia ekspłuatacyi, tak i absłuhoŭvańnia, i dla taho, kab jana zapracavała va Ukrainie, patrebny čas.
Ukraina ŭsio bolš zaležyć ad dapamohi partnioraŭ u halinie artyleryjskich bojeprypasaŭ i braniatechniki, ale takaja zaležnaść moža abiarnucca ryzykaj, pakolki zapasy mienavita hetaj vajennaj dapamohi abmiežavanyja i patrebnyja samim zachodnim sajuźnikam.
Popyt na rakiety dla «Petryjot» jość i ŭ partnioraŭ ZŠA, naprykład, Šviecyi i Saudaŭskaj Aravii, piša Uotlinh. Apošniaja štomiesiac maje patrebu ŭ ich dla abarony ad udaraŭ z boku chusitaŭ. Abjomy ž vytvorčaści rakiet zastajucca nizkimi, adznačaje Uotlinh.
«Asłabiełaja abaronnaja pramysłovaść NATA pakinuła aljans u drennym stanoviščy dla padtrymki praciahłych vysokaintensiŭnych apieracyj. U vypadku takich sistem, jak «Petryjot», zadača ŭskładniajecca, pakolki vytvorčaść takoj vysokadakładnaj zbroi, jak rakiety SPA, zajmaje značna bolš času, čym vytvorčaść niekiravalnych artyleryjskich snaradaŭ», — piša Uotlinh.
Pa danych amierykanskich ŚMI, ZŠA ŭ bližejšy čas uchvalać pastaŭku sistem «Petryjot» Ukrainie. Hetyja źviestki pakul nie paćvierdžany aficyjna.