Kamiennyja bałvany na vostravie Paschi paciarpieli ad lasnoha pažaru, niekatoryja — niepapraŭna
Na vostravie Paschi na hetym tydni zdaryŭsia pryrodny pažar, u vyniku jakoha abhareła častka znakamitych i zahadkavych statuj — maai. Miascovyja ŭłady havorać, što dla niekatorych ź ich nastupstvy vyhladajuć niepapraŭnymi.
Fota: MuniRapaNui / Facebook
Pažar zakranuŭ terytoryju kala patuchłaha vułkana Rana-Raraku, na schiłach jakoha znachodzicca častka statuj.
Ahoń nanios «niepapraŭnuju škodu» kamiennym bałvanam, paviedamiŭ u Facebook municypalitet Rapa-Nui.
Lasny pažar na vostravie pačaŭsia 4 kastryčnika, pad viečar nastupnaha dnia jaho patušyli. Ahoń raspaŭsiudziŭsia na płoščy 100 ha i dasiahnuŭ unutranaha schiłu patuchłaha vułkana Rana-Raraku, dzie znachodzicca častka statuj.
Jak paviedamili miascovyja ŭłady, ad pažaru paciarpieli amal 30 bałvanaŭ. Usiaho ŭ rajonie Rana-Raraku ich 386 — 265 zvonku i 121 ŭnutry vułkana.
Usiaho ich na vostravie amal tysiača. Hetyja kamiennyja statui vyrabiła ŭ pieryjad prykładna z 1400 h. da 1650 h. miascovaje plemia rapanui.
Vyšynia bolšaści maai — kala 4 mietraŭ, a samy vialiki ź ich uzvyšajecca na 10 mietraŭ i važyć 74 tony.
Vostraŭ Paschi adkryŭsia dla turystaŭ paśla kavidnaha karancinu ŭsiaho try miesiacy tamu. Ciapier častka jaho terytoryi znoŭ zakrytaja — śpiecyjalisty ahladajuć statui i vyśviatlajuć, nakolki surjozna jany paciarpieli.
Vostraŭ Paschi znachodzicca ŭ Cichim akijanie za 3,7 tys. km ad uźbiarežža kantynientalnaj častki Čyli. U 1995 hodzie nacyjanalny park Rapanui byŭ uklučany ŭ Śpis abjektaŭ suśvietnaj spadčyny JUNIESKA.