Pałanski: drama daŭžynioju ŭ žyćcio
Uładalnik «Palmavaj haliny», «Oskara» i «Załatoha lva» pieražyŭ hieta, śmierć maci ŭ kancłahiery Aśviencim, kryvavaje zabojstva žonki relihijnym mańjakam, a taksama sprečnaje abvinavačvańnie ŭ zhvałtavańni.
«Kino pavinna prymusić vas zabyć, što vy siadzicie ŭ kinateatry», — skazaŭ koliś Raman Pałanski. I praŭda: jaho stužki dramatyčnyja, poŭnyja niečakanych vynachodak, jakija začaroŭvajuć. Adnak žyćcio režysiora vyjaŭlajecca jašče dramatyčniejšym za ŭsie ŭźvivy kiniematahrafičnych siužetaŭ. Uładalnik «Palmavaj haliny», «Oskara» i «Załatoha lva» pieražyŭ hieta, śmierć maci ŭ kancłahiery Aśviencim, kryvavaje zabojstva žonki relihijnym mańjakam, a taksama sprečnaje abvinavačvańnie ŭ zhvałtavańni.
Raman Pałanski pačynaŭ jak aktor: pieršy film u aŭtara «Pana Tadevuša» Andžeja Vajdy, film «Pakaleńnie» (1955). Potym režysiorskija kursy ŭ Hdańsku. U 1962 hodzie na Radzimie ŭ Polščy zdymaje svoj pieršy poŭnamietražny film, trymcieńnik «Nož u vadzie», jaki atrymaŭ «Oskara» jak najlepšaja zamiežnaja stužka.
U 1968 h. Pałanski zdymaje žachałku pra achviaraŭ sataninskaha kultu «Dzicia Razmary». Nie paśpieŭšy spažyć pieršuju słavu ŭ Halivudzie, u 1969 hodzie Pałanski daviedvajecca, što jaho žonku i troch siabroŭ zabili členy relihijnaj siekty, jakoj vierchavodziŭ Čarlz Mensan.Paśla śmierci žonki Pałanski źjazdžaje ŭ Jeŭropu. Trahiedyja mocna paŭpłyvała na dalejšuju tvorčaść režysiora, što ŭvasobiłasia ŭ takich stužkach, jak «Makbiet» (1971), praciah «Dzicia Razmary» «Žychar» (1976), a taksama ŭ dramie pra sadamazachisckija adnosiny «Horkaja poŭnia» (1992).
Na hetym złybiedy režysiora nie skončylisia.
U 1977 hodzie jaho asudzili za zhvałtavańnie 13‑hadovaj dziaŭčyny ŭ domie, jaki naležaŭ Džeku Nikałsanu. Pałanski častkova pryznaŭ vinu, ale nieŭzabavie ŭciok z ZŠA ŭ Brytaniju, a potym, kab paźbiehnuć vysyłki, u Francyju.Adbyvajecca doŭhi pierapynak u karjery. U 1999 hodzie Raman Pałanski zdymaje mistyčny tryler «Dziaviataja brama», u jakoj hałoŭnuju rolu hraje Džoni Dep.
Pry kancy 90‑ch Pałanski źviartajecca da blizkaj jamu temy Hałakostu. U vyniku jon vykarystaŭ u jakaści litaraturnaj asnovy nie ŭłasnyja ŭspaminy, a apovied Uładysłava Špilmana, talenavitaha polskaha pijanista, što pieražyŭ žachi Varšaŭskaha hieta, i jakoha vyratavaŭ niamiecki aficer. «Pijanist» zdabyŭ «Załatuju palmavuju halinu» Kanskaha kinafestu, a aktor, jaki hraŭ hałoŭnuju rolu, Edryjen Broŭdzi, zrabiŭsia samym maładym uładalnikam «Oskara» za najlepšuju mužčynskuju rolu.
U vieraśni 2009 hoda Pałanski prybyŭ u Šviejcaryju, kab atrymać režysiorskuju ŭznaharodu. 26 vieraśnia arhanizatary kinafesta ŭ Ciurychu paviedamili presie, što režysior byŭ aryštavany pa ordery, datavanym 1978 hodam.