Zamiest «Mahnita Minska» buduć budavać «Biełaruski handlovy dom». Płanujuć spravicca da kanca nastupnaha hoda
Minsk skasavaŭ damovu ź iranskaj kampanijaj, jakaja zaciahnuła budaŭnictva šmatfunkcyjanalnaha centra na skryžavańni pr-ta Niezaležnaści i vuł. Kiryły Turaŭskaha. Na jaho miescy ciapier budzie ŭzvodzicca «Biełaruski handlovy dom», piša Office.line.
«Jość zadańnie adkryć handlovy centr. Jak alternatyvu «Stalicy». Hety inviestycyjny prajekt siem hadoŭ nie ruchaŭsia, tamu my skasavali damovu ź inviestaram i budziem sami dabudoŭvać hety abjekt i adkryvać jaho jak vialiki handlovy dom «Vyrablena ŭ Biełarusi». Jon pavinien pabudavacca da kanca nastupnaha hoda. Času ŭ nas niama. Treba brać i rabić», — skazała ŭ efiry tok-šoŭ «Budni» na «Alfa Radyjo» namieśnica staršyni Minharvykankama Nadzieja Łazarevič.
Kompleks zajaŭlaŭsia jak šmatfunkcyjanalny, u jaho składzie mieli być hatel, ofisy, handlova-zabaŭlalnaja častka. Ciapier ža kancepcyja źmianiłasia: zamiest kompleksu vyrašyli zbudavać handlovy centr z pradstaŭlenymi ŭ im biełaruskimi brendami.
Nadzieja Łazarevič udakładniła, što ŭ HC možna budzie znajści nie tolki staličnuju pradukcyju, ale i tavary, jakija vyrablajucca ŭ inšych biełaruskich rehijonach. U tym liku, maŭlaŭ, tam buduć unikalnyja rečy, jakija nie sustrenieš u bujnych handlovych sietkach.
Cikavaść z boku kiraŭnikoŭ abłaściej i samich pradpryjemstvaŭ jość, tym bolš što im buduć, pa słovach Łazarevič, dadzienyja «prymalnyja ŭmovy pa arendzie i piśmiennaje supravadžeńnie». Ničoha dziŭnaha ŭ hetym niama — hety prajekt pad asablivym kantrolem Łukašenki i jon sam jaho niadaŭna praanansavaŭ i daŭ adpaviednyja rasparadžeńni, naviedvajučy handlovy centr «Stalica» ŭ centry Minska.