Siłaviki zatrymali lidarku Baranavickaj BSDP Tamaru Patockuju
Učora ŭ milicyju vylikali lidarku baranavickaj supołki Biełaruskaj sacyjał-demakratyčnaj partyi, siabru inicyjatyŭnaj hrupy Cichanoŭskaj Tamaru Patockuju. Z pastarunku jana tak i nie vyjšła
Tamara Patockaja da vybaraŭ była viadomaja ŭ Baranavičach taksama jak haspadynia ahrasiadziby Čyžy, što mieściłasia niepadalok ad horada.
Taksama była kandydatkaj pratestu pavodle stratehii Mikałaja Statkieviča. U 2020 hodzie jana padavała dakumienty ab rehistracyi inicyjatyŭnaj hrupy ŭ CVK, ale jaje zajaŭku nie zarehistravali. 19 traŭnia 2020 hoda Tamaru Patockuju zatrymali ŭ Viarchoŭnym sudzie, kudy jana pryjšła na razhlad skarhi. U vyniku praz paru dzion asudzili za toje, što jana nibyta nie padparadkavałasia «zakonnym patrabavańniam milicyjanta» pakinuć sudovuju zału. Niemaładaja žančyna raspaviała, što ŭ RUUS jaje «bili pa nyrkach, kali zabirali telefon… Kali abšukvali, raździavali dahała». Tak siłaviki pavodzili siabie ŭ traŭni 2020 hoda, jašče da masavych žnivieńskich pratestaŭ, paviedamlaje «Novy čas».
Tamara Patockaja była i davieranaj asobaj Śviatłany Cichanoŭskaj. Jašče pierad vybarami spadarynia Tamara zaklikała nie chadzić na daterminovaje hałasavańnie i raspaviadała ŭ ŚMI, što padčas vybaraŭ «usio budzie zaležać ad kožnaha z nas dla źmieny ŭłady».