Biełaruska pryjechała na radzimu, kab pamianiać pašpart. Pa darozie nazad jaje zatrymali za niezakonny pierachod miažy
Hramadzianka Biełarusi vymušanaja była z Ukrainy praz Polšču pajechać u Biełaruś, kab abmianiać pašpart u suviazi z dasiahnieńniem 45-hadovaha ŭzrostu, paviedamlaje «Svaboda».
Na zvarotnym šlachu jaje zatrymali ŭkrainskija pamiežniki za niezakonnaje pierasiačeńnie miažy i skłali akt ab administracyjnym pravaparušeńni.
U sudzie biełaruska paviedamiła, što vymušanaja była jechać u Biełaruś praz Polšču, bo biełaruska-ŭkrainskaja miaža zakrytaja, a konsulstva Biełarusi va Ukrainie, dzie jana mahła b abmianiać pašpart u suviazi z zakančeńniem terminu dziejańnia, nie pracuje. Va Ukrainie jana maje siamju i vid na stałaje pražyvańnie.
Pamianiaŭšy pašpart, jana nie zmahła atrymać polskuju vizu, kab viarnucca tym ža šlacham, tamu vyrašyła pierasiačy biełaruska-ŭkrainskuju miažu, niahledziačy na toje, što punkty propusku zakrytyja ŭ suviazi z vajennaj ahresijaj Rasii suprać Ukrainy. U Biełarusi, jak jana padkreśliła, joj nie było dzie žyć.
U Žytomirskaj vobłaści jaje zatrymali ŭkrainskija pamiežniki i nakiravali ŭ sud materyjały ab pryciahnieńni hramadzianki Biełarusi da adkaznaści: pavodle ŭkrainskaha zakanadaŭstva, joj pahražaŭ štraf abo aryšt da 15 sutak.
Ale sud vysłuchaŭ jaje historyju i zakryŭ spravu, nie znajšoŭšy składu administracyjnaha pravaparušeńnia.
Usie supracoŭniki ambasady Biełarusi va Ukrainie na čale z pasłom Iharam Sokałam vyjechali adtul 19 sakavika 2022 hoda. U jakaści pryčyny evakuacyi ambasadar Sokał nazvaŭ «nievynosnyja ŭmovy pracy — u pryvatnaści, pasolstvu zabłakavali ŭsie finansavyja rachunki, a supracoŭnikam nibyta pastupali «pahrozy fizičnaj raspravy».