U Buda‑Kašalovie baćku, jaki zabiŭ piacimiesiačnaha syna, asudzili da 19 hadoŭ kałonii ŭzmocnienaha režymu
U Buda-Kašalovie skončyŭsia sud nad 32-hadovym baćkam, abvinavačanym u zabojstvie syna. Jaho asudzili da 19 hadoŭ pazbaŭleńnia voli ŭ kałonii ŭzmocnienaha režymu, piša «Homielskaja praŭda» sa spasyłkaj na pres-słužbu abłasnoha suda.
Śledstva śćviardžała, što ŭ śniežni 2021 hoda abvinavačany ź dziciem pajechaŭ u piedyjatryčnaje adździaleńnie Buda-Kašaloŭskaj balnicy. Ich źmiaścili ŭ pałatu, u jakoj nie było inšych chvorych. Chvory chłopčyk nie davaŭ baćku zasnuć — mužčyna pačaŭ bić dzicia, a ranicaj vyjaviŭ, što niemaŭla miortvaje.
Žychara Buda-Kašaloŭskaha rajona pryznali vinavatym u zabojstvie małaletniaha, jaki znachodzicca ŭ biezdapamožnym stanie (punkt 2 častki 2 artykuła 139 KK).
Abvinavačany svaju vinu na sudzie nie pryznaŭ i śćviardžaŭ, što dzicia pamierła z-za ŭdaru ab śpinku łožka. Zhodna z zaklučeńniem sudova-miedycynskaj ekśpiertyzy, śmierć nastupiła ad zakrytaj čerapna-mazhavoj traŭmy, uskładnienaj aciokam hałaŭnoha mozha. Na ciele dziciaci vyjaŭlenyja šmatlikija siniaki, pisała vydańnie.