Pružanski rajvykankam niezakonna adpraŭlaŭ dziaciej u dziciačyja damy
Sud Pružanskaha rajona admianiŭ niezakonnaje rašeńnie Pružanskaha rajvykankama, jakoje parušała pravy małaletnich dziaciej
Sud Pružanskaha rajona admianiŭ niezakonnaje rašeńnie Pružanskaha rajvykankama, jakoje parušała pravy małaletnich dziaciej.
Sens rašeńnia byŭ u tym, što miascovamu adździełu adukacyi dazvalałasia źmiaščać dziaciej va ŭzroście ad paŭtara da troch hadoŭ u sacyjalny prytułak, paśla taho jak jany zastavalisia biez apieki baćkoŭ. Ale hetaje rašeńnie supiarečyła art. 18 Zakona RB «Ab asnovach sistemy prafiłaktyki bieznahladnaści i pravaparušeńniaŭ niepaŭnaletnich». Zhodna z hetym artykułam, takija dzieci pavinny znachodzicca ŭ arhanizacyjach achovy zdaroŭja, a ŭ sacyjalny prytułak prymajucca niepaŭnaletnija dzieci va ŭzroście ad 3 da 15 hadoŭ.
Prakuror Pružanskaha rajona apratestavaŭ takoje rašeńnie, ale niahledziačy na jaho vidavočnuju niezakonnaść, rajvykankam pratest prakurora nie razhledzieŭ i patrabavańni pra admienu rašeńnia nie vykanaŭ.
U suviazi z hetym prakuror Pružanskaha rajona paviedamiŭ pra situacyju prakuroru Bresckaj vobłaści, jaki ŭ svaju čarhu źviarnuŭsia z pratestam ŭ Brescki abłvykankam. Jon zapatrabavaŭ admianić niezakonnaje rašeńnie Pružanskaha rajvykankama, jakoje parušaje pravy małaletnich dziaciej. Adnak abłvykankam nie vynies razhlad pratesta na svaje pasiedžańnie, a namieśnik staršyni abłvykankama ŭ svaim adkazie zhadziŭsia z arhumientami prakurora, ale paviedamiŭ, što ličyć niemetazhodnym admienu rašeńnia.
Tady prakuror vobłaści źviarnuŭsia z zajavaj u sud Pružanskaha rajona. Rašeńniem suda patrabavańni prakuratury narešcie byli zadavolenyja i niezakonnaje rašeńnie Pružanskaha rajvykankama admienienaje.