U Minsku prypyniajuć budaŭnictva modnaha kvartała
«A-100 Deviełapmient» prypyniaje budaŭnictva modnaha kvartała «Depo». Hetuju infarmacyju błohu «Otražienije» paćvierdzili ŭ kampanii.
Uzvodzić kvartał «Depo» stali kala hoda tamu. Raźmiaščajecca jon u centry Minska, kala płoščy Pieramohi.
Pavodle prajekta, «Depo» — heta žyły kompleks biznes-kłasa z kramami, pryvatnym dziciačym sadam, piešachodnaj vulicaj i štučnaj sažałkaj, skazana na sajcie «A-100 Deviełapmient».
U studzieni 2021-ha kampanija zapuściła prodažy kvater i pientchaŭsaŭ. Košt kvadratnaha mietra startavaŭ z 3500 dalaraŭ.
«Ja pracuju na budoŭli ŭ VK «Depo». Na dniach vyvieźli adtul častku materyjałaŭ. Na abjekcie nivodnaha budaŭnika», — raspavioŭ adzin z čytačoŭ.
U kampanii «A-100 Deviełapmient» paćvierdzili: sapraŭdy, jany prypyniajuć budaŭnictva. Na jaki mienavita termin zamarožvajuć «Depo» i čamu, u kampanii nie ŭdakładniajuć.