«Niachaj hetyja słovy Anioła znojduć vodhuk i ŭ našych sercach»: vinšavańnie z Kaladami biskupa Aleha Butkieviča
Sa śviatam Božaha Naradžeńnia katalikoŭ pavinšavaŭ staršynia Kanfierencyi katalickich biskupaŭ u Biełarusi, biskup Viciebski Aleh Butkievič.
vitebsk.cc
«Syn Božy, jakoha dźvie tysiačy hadoŭ tamu čałaviectva sustreła jaślami ŭ chlavie, niachaj ciapier znojdzie ŭ sercy kožnaha z vas utulnaje miesca svajoj prysutnaści ŭ hetym śviecie. Niachaj Jon apramieńvaje svaim śviatłom kožny zakutok vašaha žyćcia, napaŭniaje svaim spakojem i adorvaje radaściu. Tolki tady my zmožam žyć u zhodzie i parazumieńni, znachodziačy vyjście sa składanych situacyj, jakimi tak ščodra apošnim časam nadzialaje nas los.
«Nie bojciesia, abviaščaju vam vialikuju radaść <…>, naradziŭsia vam siońnia Zbaŭca!»( Łk 2, 10).
Niachaj hetyja słovy Anioła, skiravanyja kaliści da betlejemskimskich pastuškoŭ, znojduć vodhuk i ŭ našych sercach, napaŭniajučy ich nadziejaj i davieram da biaźmiežnaj i miłasernaj Božaj Lubovi, jakaja asablivym čynam atulaje siońnia ŭvieś śviet. Niachaj jana učynić siońnia našyja sercy zdolnymi da prabačeńnia, kab biełaja apłatka, jakoj my budziem dzialicca ź bližnimi pry vihilijnym stale, stała dziejsnym znakam pajadnańnia. Lehienda śćviardžaje, što ŭ hetuju noč navat žyvioła razmaŭlaje čałaviečym hołasam. Niachaj i nam siońnia chopić pakory praciahnuć ruku da prymireńnia i ad usiaho serca daravać kryŭdy.
Niachaj Božaje Naradžeńnie napoŭnić vašaje žyćcio šmatlikimi łaskami, niachaj stanie krynicaj sapraŭdnaj radaści i nadziei, a našuju krainu atulić apiekaj Biezzahannaj Maci i Jaje śviatoha Abrańnika Juzafa!
Božaje basłaŭleńnie niachaj spadarožničaje vam padčas hetych śviataŭ i na praciahu ŭsiaho nadychodziačaha Novaha, 2022 hoda!
Radasnaha Śviata i ščaślivaha Novaha hoda!
Aleh Butkievič, biskup Viciebski, staršynia Kanfierencyi Katalickich Biskupaŭ u Biełarusi