Čarhovaja śmierć na biełaruska-polskaj miažy: paviedamlajuć ab śmierci 16-hadovaha chłopca
16-hadovy irakiec, jaki znachodziŭsia ŭ ciažkim stanie, u piatnicu pozna ŭviečary razam sa svajoj siamjoj zdoleŭ prarvacca na polski bok. Potym usia siamja była vycieśnienaja ŭ Biełaruś polskimi pamiežnikami. Na žal, 16-hadovy chłopiec nočču pamior, paviedamlajuć aktyvisty polskamu partału Onet.
U piatnicu ŭviečary pradstaŭniki Fondu ratavańnia atrymali infarmacyju ad znajomaj žurnalistki, što polskuju miažu ŭdałosia pierasiekčy siamji ź Iraka. U hetaj hrupie było čaćviora dziaciej, u tym liku samy małodšy va ŭzroście kala 18 miesiacaŭ. U horšym stanie znachodziŭsia 16-hadovy chłopčyk, jakoha, jak vyśvietlili pradstaŭniki fondu, vanitavała kryvioju.
Siamju zaviarnuli ŭ Biełaruś polskija pamiežniki. Na žal, 16-hadovy chłopiec hetaj nočču pamior, śćviardžajuć aktyvisty.
Čamu 16-hadovamu irakcu nichto nie akazaŭ dastatkovaj dapamohi, kab vyratavać jaho ad śmierci? Aktyvistka tłumačyć, što dapamohi jon nie atrymaŭ ni ŭ Polščy, ni ŭ Biełarusi.
Pra śmierć 16-hadovaha chłopčyka žurnalisty spytali polskuju pamiežnuju słužbu. Adnak kankretnych adkazaŭ jany nie atrymali.
Major Katažyna Zdanovič paviedamiła, što apisanaja vyšej situacyja «mahła mieć miesca ź biełaruskaha boku», i rekamiendavała ŭ takim vypadku źviazacca z «biełaruskim dypłamatyčnym pradstaŭnictvam».