Biełaruskaja dyjaspara ciśnie na brytanskija kampanii, jakija pracujuć ź Biełaruśsiu
Siarod takich karparacyj — Rolls-Royce i British American Tobacco.
Šerah brytanskich kampanij, jakija viaduć biznes u Biełarusi, trapili pad biesprecedentny cisk z boku roznych krynic, u tym liku z boku biełaruskaj dyjaspary. Niekatoryja z kampanij, u tym liku Rolls-Royce i British American Tobacco, pad takim upłyvam hatovyja pierahledzieć svajo staŭleńnie da situacyi ŭ Biełarusi.
Paśla historyi z prymusovaj pasadkaj 23 maja ŭ aeraporcie «Minsk-2» samalota kampanii Ryanair i aryštu dvuch pasažyraŭ, žurnalista Ramana Pratasieviča i jaho dziaŭčyny, brytanskija aktyvisty ŭzmacnili cisk na ŭłaśnikaŭ biełaruskich bondaŭ na Łondanskaj fondavaj biržy. Niekatoryja brytanskija kampanii adreahavali jašče i na šerah vypadkaŭ mierkavanaha parušeńnia pravoŭ na biełaruskich dziaržaŭnych pradpryjemstvach. Heta pravy na svabodu schodaŭ, zabastoŭku i stvareńnie niezaležnych prafsajuzaŭ, piša Guardian.
Siarod takich kampanij — Rolls-Royce, adzin z pastaŭščykoŭ biełaruskaha kancerna BiełAZ. Pradstaŭniki Rolls-Royce paviedamili, što kampanija analizuje pytańni, što datyčacca suviazi jaje niamieckaha brenda Power Systems i BiełAZa. U zaležnaści ad vynikaŭ rasśledavańnia kampanija hatovaja pierahledzieć usio isnujučaje i mahčymaje ŭ budučyni supracoŭnictva ź biełaruskim kancernam. Jak śviedčać brytancy, jany taksama zhodnyja ź lubymi sankcyjami, jakija ŭvodziacca.
Taksama praciahvajucca pratesty pierad budynkam kampanii British American Tobacco, jakaja supracoŭničaje z Hrodnienskaj tabačnaj fabrykaj «Nioman». Hetaja fabryka vyrablaje cyharety pa licenzii brytanskaj karparacyi.
Pradstaŭnik British American Tobacco paćvierdziŭ, što kampanija hatovaja pryniać dadatkovyja miery z metaj abarony pravoŭ biełaruskich pracaŭnikoŭ. Tak, biełaruskaje padraździaleńnie karparacyi ŭ hetym hodzie projdzie ŭzmocnienuju kompleksnuju pravierku pa pytańni abarony pravoŭ čałavieka. Što datyčyć fabryki «Nioman», to na jaje terytoryi projdzie pravierka pracoŭnych umoŭ z dapamohaj niezaležnaha aŭdytara.
Pradstaŭnik Zhurtavańnia biełarusaŭ u Vialikabrytanii, jaki ŭdzielničaje ŭ kampanii ŭpłyvu na brytanskija pradpryjemstvy, paviedamiŭ Guardian, što jany źviernuć uvahu i na inšyja vypadki supracoŭnictva brytanskich kampanij i biełaruskich dziaržaŭnych pradpryjemstvaŭ. Naprykład, jon śćviardžaje, što niekatoryja kampanii kuplajuć u Biełarusi draŭninu ŭ značnych abjomach. Ale, pa słovach aktyvista, brytanskija kampanii nie nadta schilnyja da ŭvahi da situacyi ŭ Biełarusi, im bližejšaja pazicyja «zarablaj, pakul mahčyma».