Žurnalisty znajšli ŭłaśnika pašparta, jaki vykarystoŭvaŭ u Čechii mierkavany ahient HRU «Piatroŭ»
Pašpart hramadzianina Respubliki Małdova, padroblenuju kopiju jakoha mierkavana vykarystaŭ u Čechii ŭ 2014 hodzie supracoŭnik rasiejskaj vajskovaj raźviedki Alaksandar Miškin (jon ža «Alaksandr Piatroŭ»), naležaŭ realnaj asobie, piša Radyjo Svaboda.
Falšyvyja pašparty Bašyrava i Piatrova.
Pra heta napisaŭ u fejsbuku žurnalist daśledčaha vydańnia RISE Moldova Uładzimir Tchoryk. Pavodle jaho, identyfikavać ŭładalnika pašpartu małdoŭskija žurnalisty zdoleli pry dapamozie zamiežnych kalehaŭ.
Raniej kopiju pašpartu hramadzianina Małdovy na imia Mikałaj Popa apublikavała daśledčaja hrupa Bellingcat. Śćviardžajecca, što kopija fihuruje ŭ materyjałach českaha śledztva ab vybuchach na składach bojeprypasaŭ u pasieliščy Verbiecicy ŭ 2014 hodzie, u jakich padazrajuć supracoŭnikaŭ HRU.
Kopii padroblenych pašpartoŭ na imiony hramadzianaŭ Tadžykistanu i Małdovy byli, jak śćviardžajecca, nakiravanyja na skład, kab rasiejskija ahienty atrymali tudy dopusk. Pry hetym u pašpart na imia Popy byŭ uklejeny fotazdymak Miškina-«Piatrova». Nieviadoma, adnak, ci byŭ hety pašpart vykarystany ŭ realnaści, kab trapić na skład. U Čechiju supracoŭniki HRU zajechali pa inšych padroblenych pašpartach — na imiony rasiejcaŭ Alaksandra Piatrova i Rusłana Bašyrava.
Jak vyśvietlili małdoŭskija žurnalisty, dla vyrabu padroblenaj kopii pašpartu na imia Mikałaja Popy byŭ vykarystany pašpart hramadzianina Respubliki Małdova Vitala K. z Drokijeŭskaha rajonu Małdovy. Jon žyvie ŭ ZŠA. Jaho asobu atrymałasia identyfikavać dziakujučy bazie dadzienych avijapieralotaŭ. Vyśvietliłasia, što hramadzianin Małdovy karystaŭsia svaim pašpartam jašče ŭ 2015 hodzie, heta značyć užo paśla vybuchaŭ na českich składach.
U pryvatnaści, jon lotaŭ pa im ź Nju-Jorku ŭ Kišyneŭ tranzytam praz Maskvu. Žurnalisty źviazalisia ź Vitalom K., jaki paćvierdziŭ hetuju infarmacyju, padkreśliŭšy, što ŭ Maskvie nie pakidaŭ tranzytnuju zonu aeraportu. Pavodle jaho, pry pieralotach nie ŭźnikła nijakich prablem.
U pašparcie, jaki vykarystaŭ Miškin-«Piatroŭ», ad sapraŭdnaha pašparta pakinuli numar i hod vydačy. Imia i daty naradžeńnia byli padroblenyja.
- Českija ŭłady abviaścili ab padazreńni na adras ahientaŭ rasiejskaj vajskovaj raźviedki ŭ siaredzinie krasavika. Kiraŭniki Čechii — za vyklučeńniem prezydenta Miłaša Zemana — śćviardžajuć, što jość tolki adna versija vybuchaŭ, a mienavita dačynieńnie Rasiei.
- Jak miarkujecca, metaj vybuchaŭ byli bojeprypasy, jakija pryznačalisia dla pastaŭki za miažu, mahčyma va Ŭkrainu. Pry vybuchach zahinuli dvoje supracoŭnikaŭ firmy IMEX. Čechija vysłała 18 supracoŭnikaŭ rasiejskaj ambasady. Paśla seryi krokaŭ u adkaz kožnaha z bakoŭ Rasieja i Čechija ŭ pryncypie pahadzilisia na uraŭnoŭvańnie kolkaści supracoŭnikaŭ ambasadaŭ kožnaj z krainaŭ. Rasieja abvinavačvańni ŭ datyčnaści da vybuchaŭ kateharyčna admaŭlaje.