U Biełarusi stvorać dziaržorhan pa rehulavańni ličbavaj śfiery
Pra heta paviedamiŭ žurnalistam pieršy namieśnik premjer-ministra Mikałaj Snapkoŭ pa vynikach narady ŭ Łukašenki, piša BiełTA.
BiełTA
Mikałaj Snapkoŭ nazvaŭ temu pa vyznačeńni adzinaha dziaržrehulatara ličbavaj śfiery niaprostaj.
«Nie chaciełasia b uradu prosta pamianiać nazvu, ale nie pamianiać sens i sutnaść, pakolki mała i niedastatkova prosta stvaryć novy adziny rehulatar. Vielmi važna stvaryć u kožnym ministerstvie, u kožnaj vobłaści viertykal kampietencyj, heta značyć ludziej, jakija b razumieli, što treba rabić u ličbavizacyi adpaviednych halin, jakim čynam vykarystoŭvać ličbavizacyju dla pavyšeńnia pradukcyjnaści», — skazaŭ jon.
Taksama Snapkoŭ skazaŭ, što ŭrad unios prapanovu, kab kantralujučym orhanam pa dziejnaści kryptabirž i ličbavych znakaŭ źjaŭlałasia Administracyja Parku vysokich technałohij. Łukašenka prapanovu padtrymaŭ.