Schod ledavika ŭ Indyi: 125 čałaviek prapali bieź viestak
Ledavik, jaki syšoŭ z Himałajaŭ, razburyŭ płacinu i vyklikaŭ pavodku ŭ štacie Utarakchand na poŭnačy Indyi.
Choć vioski ŭ zatoplenaj dalinie byli evakujavanyja, miescaznachodžańnie jak minimum 125 čałaviek nieviadomaje. Ratavalniki ŭžo vyjavili cieły siami zahinułych, piša VVS.
U vyratavalnych rabotach udzielničajuć sotni ludziej, u tym liku padraździaleńni palicyi, armii i vajskovyja viertaloty.
Ledavik syšoŭ z hary Nandadevi, druhoj pa vyšyni viaršyni Indyi, jakaja ŭvachodzić u hornuju sistemy Himałajaŭ.
Spuściŭšysia pa hornych rekach, jon udaryŭ pa płacinach dvuch hidraelektrastancyj, što budujucca. Adna z płacin razburanaja.
Bolšaść źnikłych — zaniatyja na hetych budoŭlach rabočyja.
Katastrofa adbyłasia ŭ addalenym rajonie, tamu pakul niama peŭnaha adkazu, što vyklikała schod ledavika.
Ekśpierty miarkujuć, što adnoj z pryčyn taho, što vialikija kavałki lodu adłamalisia ad masivu, moža być paciapleńnie i vyklikanyja im apadki. Heta mahło vyklikać schod łavin z kamianiami i brudam.
Ekśpierty taksama miarkujuć, što łavina mahła syści na ledavikovaje voziera, kali takoje było na jaje šlachu, i jano vyjšła ź bierahoŭ.
Inšaja viersija — łavina abo apoŭzień mahli sychodzić u raku na praciahu niejkaha času, pakul jana nie vyjšła ź bierahoŭ.