Tavaryski i ahresiŭny
Druhija sutki milicyja šukaje Siarhieja Bahdašova, jaki źbieh sa zbrojaj 29 maja z budynka suda ŭ Žodzinie (Minskaja vobłaść).
Druhija sutki milicyja šukaje Siarhieja Bahdašova, jaki źbieh sa zbrojaj 29 maja z budynka suda ŭ Žodzinie (Minskaja vobłaść).
Jak paviedamili BiełaPAN u adździaleńni infarmacyi i hramadskich suviaziej UUS Minabłvykankama, na terytoryi staličnaha rehijona praciahvaje dziejničać płan «Sirena», vyjezdy i vychady z Žodzina błakiravanyja.
Siarhiej Bahdašoŭ abvinavačvajecca va ŭčynieńni złačynstva, praduhledžanaha č. 4 art. 205 Kryminalnaha kodeksa (kradziež). Za im ličylisia kala troch dziesiatkaŭ kryminalnych epizodaŭ. Dziaržaŭny abvinavaŭca patrabavaŭ pryhavaryć złačyncu da 10 hadoŭ pazbaŭleńnia voli. Začytać pryhavor sudździa nie paśpieŭ.
Pavodle infarmacyi UUS, 31‑hadovy ŭradženiec Jalizava (Mahiloŭskaja vobłaść) 29 maja ŭ 14.40 u budynku suda ŭčyniŭ napad na kanvaira, zavałodaŭ jaho tabielnaj zbrojaj PM z vaśmiu patronami i ŭciok.
Prymiety Bahdašova: na vyhlad 30—35 hadoŭ, rost 178—180 sm, siaredniaha ciełaskładu, vałasy ciomnyja, stryžka karotkaja, na tvary ciomnaja ščacina trochdzionnaj daŭniny. Byŭ apranuty: bajka z kapiušonam šeraha koleru i čyrvonymi ŭstaŭkami, džynsy siniaha koleru, na nahach krasoŭki čornaha koleru na «lipučkach». Pry sabie maje šalik z łahatypam adnaho ź biełaruskich futbolnych kłubaŭ. Asablivyja prymiety: na šyi majucca ślady ad baraćby ŭ vyhladzie drapin i hiematom. Maje navyki vałodańnia pryjomami rukapašnaha boju, ahresiŭny, pry zatrymańni moža akazvać supraciŭleńnie. Dobra ŭvachodzić u kantakt, tavaryski.
UUS Minabłvykankama prosić usich hramadzian, jakija vałodajuć jakoj‑niebudź infarmacyjaj ab miescy znachodžańnia Bahdašova, paviedamić u najbližejšy adździeł unutranych spraŭ abo pa telefonach 229‑04‑03, 229‑05‑90 ci 102.