Pamianiajcie radyjo na sieciva
Abo čysta biełaruski drajv u anhlijskim filmie. Pra kinastužku «Rok‑chvala» piša Pavał Kaściukievič.
«Rok‑chvala» — The Boat That Rocked, Vialikabrytanija—Niamieččyna, 2009, 129 chv.
Kiepskija naviny: rok‑n‑roł daŭno pamior. Dobryja naviny: układalniki epitafij pa‑raniejšamu stryhuć kupony. Viesnavaja «Rok‑chvala» — adnajajkavy bliźniuk zimovych «Stylahaŭ» Tadaroŭskaha: historyja staleńnia chłopca, jaki abraŭ šlach być nie jak usie.
Apovied, za jakim prahladajecca historyja staleńnie zachodniaha hramadstva.
Tema rok‑n‑rołu čarhovy raz paśpiachova zakrytaja. Siužet taki. Mama pasyłaje syna‑boŭdziłu, vyklučanaha sa škoły, dabrać rozumu da chrosnaha baćki — i kudy! — na karabiel, poŭny raspasienych, lohkich na jazyk i ŭčynki radyjoviadoŭcaŭ, što pracujuć na pirackim «Radyjo Rok». Seks, narkotyki i ŭsio takoje pa poŭnaj prahramie na asobna ŭziataj pałubie. I, viadoma, kiepskija dziadźki z uradu Jaje Vialikaści ŭ zašpilenych na ŭsie huziki harniturach, by akuły, kružlajuć vakoł i prahnuć kryvi. Antysistemnaja rytoryka: my suprać ich, jaskravaja asoba vs. šery aficyjoz. I, peŭna, dla anhła‑amierykanskaha vucha «Majo pakaleńnie» hurtu The Who i «So Long, Marianne» Leanarda Koena kładziecca hajučym balzamam hetaksama, jak dla postsavieckaha «Skutyja adnym łancuhom» «Naŭtyłusaŭ».
A jašče: pamianiajcie Anhielščynu 1960‑ch na Biełaruś 2000‑ch, a radyjo — na sieciva.
Umoŭnaść siužetu, naciahnutaści i niestykoŭki ahinajucca zuchavatymi dościpami, kpinkami i vydatnaj ihroj aktoraŭ. Siužet zabivaje takija filmy, usio roŭna jak historyja zhubiła rok‑n‑roł: voś było b dobra, kab davieku — viečnaje siońnia: biez adchadniakoŭ, zmorščynaŭ i patreby rabić niešta novaje. Kab uvieś čas zastavacca ŭ hetym zyrkim śviatle pražektaraŭ.
Ale i što z taho, što pamior! Rok‑n‑rolnyja zabavy Leanarda Da Vinčy z farbavańniem u załaty koler naturščykaŭ i niejmaviernym vynachodstvam viertalotaŭ taksama minuli.
U Minsku hetaja, ci nie najiaskravaja stužka hodu, idzie tolki ŭ kinateatry «Pieramoha» (vuł.Internacyjanalnaja, 20) — nie prapuścicie!
Čamu varta hladzieć hety film:
1. Dziela saŭndtreku, ź lubaściu i darečnaściu padabranaha: Džymi Chiendryks, Leanard Koen (tut hladzieć nie abaviazkova — dosyć padčas sieansu raz‑poraz mrojna zapluščvać vočy).
2. Dziela dychtoŭna‑raźniavolenych žestaŭ Rysa Ivansa, što hraje rok‑n‑rolnaha radyjoviadoŭcu Žyhała. Vydaje, što Rys u svajoj aktorskaj karjery dajšoŭ da kandycyi, darečy, jak i inšy brytaniec, Bił Nai (hraje dyrektara radyjo, stanoŭčuju akułu šoubizu).
3. Kab zrazumieć, adkul pajšli vyrazy «pirackaje radyjo» i «pirackija dyski».