Štab prapanuje Jarmošynaj ustalavać videakamiery na ŭčastkach — i tady ŭvohule admovicca ad naziralnikaŭ
Fota Nadziei Bužan
Pra prapanovu prafinansavać ustaloŭku na vybarčych učastkach veb-kamier, padadzienuju ŭ Centralnuju vybarčuju kamisiju, paviedamlaje inicyjatyva «Sumlennyja ludzi». Adpaviedny zvarot 28 lipienia padadzieny ŭ CVK.
Zvarot robić adsyłku da pasiadžeńnia CVK, na jakim było pryniata rašeńnie ab źmienie pastanovy samoj kamisii ad 8 maja hetaha hoda, u adpaviednaści ź jakoj u metach prafiłaktyki raspaŭsiudžvańnia karanavirusnaj infiekcyi pamienšana kolkaść naziralnikaŭ, jakija mohuć znachodzicca na ŭčastku.
U samim prajekcie prapanavana abstalavać častku ŭčastkaŭ kamierami i ŭ takim razie naohuł vyklučyć znachodžańnie tam naziralnikaŭ (za vyklučeńniem peŭnaj ich katehoryi).
Asobna ŭ prajekcie ahavorana, jak budzie finansavacca ŭstaloŭka kamier: «Raźmiaščeńnie videakamier ažyćciaŭlajecca hramadzianami za svoj košt na padstavie zajavak hramadzian».
Nahadajem, što raniej u CVK, spasyłajučysia na ciažkuju epidemijałahičnuju abstanoŭku, a taksama cisk na členaŭ vybarkamaŭ, vyrašyli abmiežavać kolkaść naziralnikaŭ na ŭčastkach u asnoŭny dzień hałasavańnia piaćciu, a ŭ dni daterminovaha hałasavańnia — tryma. Taksama kolkaść naziralnikaŭ nie moža pieravyšać 50% ad kolkaści členaŭ učastkovaj vybarčaj kamisii, kali ŭ jaje skład uvachodzić siem ci mienš čałaviek.