Surviłła, Paźniak, Šuškievič i Kazulin źviarnulisia da Jeŭraźviazu
Jany zaklikajuć nie zaprašać A. Łukašenku ŭ Prahu, bo vynikam hetaha stanie «ŭzmacnieńnie represij i etnacydu biełarusaŭ, cisku na narod, pieraśledu pa palityčnych pryčynach».
Staršynia Rady BNR Ivonka Surviłła, lider Narodnaha Frontu Zianon Paźniak, pieršy kiraŭnik niezaležnaj Biełarusi Stanisłaŭ Šuškievič i kandydat u prezydenty Biełarusi na vybarach 2006 h. Alaksandar Kazulin vystupili z supolnym zvarotam da Eŭraźviazu i Eŭrapiejskich palitykaŭ.
«My vitajem dobruju volu Eŭraźviazu, nakiravanuju na padtrymku demakratyčnych siłaŭ Biełarusi. Razam z tym, u suviazi ź inaŭhuracyjnym samitam prahramy «Uschodniaje partnerstva», jaki planuje pravieści Eŭraźviaz u Prazie 7 traŭnia hetaha hodu, my musim zajavić, što peŭnaja kanceptualnaja nieakreślenaść hetaj dobraj i ŭzajemavyhadnaj prahramy ŭ dačynieńni da dziaržaŭnaj palityki ŭ Biełarusi pryviadzie da vielmi nehatyŭnych vynikaŭ.» — havorycca ŭ zvarocie. —
«Zaprašeńnie kiraŭnika ŭłady A. Łukašenki na samit u Prahu aŭtary zvarotu nazyvajuć «znakavym dziejańniem, jakoje, faktyčna, lehitymizuje dyktaturu, skasuje niezakonnaść jaje ŭłady i pryniatych antypraŭnych rašeńniaŭ. Vynikam zaprašeńnia A. Łukašenki ŭ Prahu stanie ŭzmacnieńnie represijaŭ i etnacydu biełarusaŭ, cisku na narod, pieraśledu pa palityčnych pryčynach za inšadumstva».
«My viedajem stanovišča ŭ našym hramadztvie, uzrovień dumańnia i matyvy pavodzinaŭ A. Łukašenki, — pišuć I. Surviła, Z. Paźniak, S. Šuškievič i A. Kazulin. — Niahledziačy na mižusobnyja supiarečnaści ź niekatorymi svaimi sajuźnikami, režym Łukašenki pravodzić ź imi ŭzhodnienuju palityku, u tym liku i ŭ padychodzie da «Uschodniaha partnerstva». Niavyznačanaść palityčnych kryteryjaŭ z boku Eŭraźviazu zadavalniaje antybiełaruski režym A. Łukašenki i jaho sajuźnikaŭ, ale supiarečyć intaresam Biełarusi».
U sumiesnym zvarocie havorycca, što «amorfnaść kryteryjaŭ u dačynieńni da antybiełaruskaha režymu Łukašenki stavić pad pahrozu nacyjanalnaje, humanistyčnaje i demakratyčnaje raźvićcio biełaruskaha hramadztva. Paśla novych aryštaŭ u Biełarusi pa palityčnych pryčynach, paśla demanstratyŭnych zryvaŭ vizytu eŭrakamisara pa zamiežnych suviaziach i palityki dobrasusiedztva, jość dastatkova arhumentaŭ, kab nie zaprašać Łukašenku na samit».
Aŭtary zvarotu da Eŭraźviazu adznačajuć:
«U nas, padpisantaŭ hetaha zvarotu, roznyja partyjnyja pazycyi i roznyja pohlady na palityku, ale pahroza Niezaležnaści našaj krainy i našaj hramadzianskaj supolnaści, jakaja ŭźnikaje ŭ suviazi z adnabokimi dziejańniami ŭ dačynieńni da režymu na Biełarusi, zmušajuć nas havaryć ciapier razam i adnym hołasam: Łukašenka nie pavinien być zaprošany ŭ Prahu.My spadziajemsia na padtrymku hetaha zvarotu z boku našych bałtyjskich i zachodnich susiedziaŭ i prychilnikaŭ adkaznaj palityki», — pišuć I. Surviła, Z. Paźniak, S. Šuškievič i A. Kazulin u zvarocie da Eŭraźviazu i eŭrapiejskich palitykaŭ.