Minzdaroŭja źbirajecca vyznačyć, kolki biełarusaŭ nasamreč pierachvareli na COVID-19
Ministerstva achovy zdaroŭja płanuje pravieści ŭ asobnych rajonach krainy centralizavanyja daśledavańni dla vyznačeńnia imunnaj prasłojki da COVID-19, paviedamiŭ žurnalistam ministr achovy zdaroŭja Uładzimir Karanik, pieradaje BiełTA.
Fota Nadziei Bužan
«My pastarajemsia zrabić heta maksimalna apieratyŭna. Pa šerahu rajonaŭ budziem pravodzić centralizavanyja daśledavańni ŭsich pacyjentaŭ, jakija znachodzilisia na balničnym liście ŭ apošnija dva miesiacy ŭ suviazi z reśpiratornymi infiekcyjami», — skazaŭ Uładzimir Karanik.
Pavodle słoŭ ministra, nielha vyklučać vierahodnaści druhoj chvali zachvaralnaści na karanavirus u asieńnie-zimovy pieryjad. «Tamu my budziem pravodzić daśledavańni, kab vyznačyć imunnuju prasłojku siarod našaha nasielnictva. U niejkich rajonach heta budzie centralizavana, niedzie budzie naładžana mahčymaść prajści ŭsim žadajučym», — dadaŭ jon.
Dla takich daśledavańniaŭ płanujuć vykarystoŭvać ekspres-testy na antycieły da COVID-19. Čakajecca, što jany ŭ chutkim časie prybuduć u krainu rejsam z Kitaja. Na nastupnym tydni čakajucca dadatkovyja pastaŭki. Na pieršym etapie testy raźmiarkujuć pa miedycynskich ustanovach. Paśla hetaha daduć mahčymaść prachodzić teściravańnie ŭsim žadajučym.
Uładzimir Karanik rastłumačyŭ, što ekspres-testy pakazvajuć najaŭnaść antyciełaŭ. U pieryjad razharu kliničnych simptomaŭ jany vyjaŭlajuć najaŭnaść imunahłabulinaŭ M, jakija śviedčać ab aktyŭnym infiekcyjnym pracesie. Kali čałaviek pierachvareŭ niekatory čas tamu, u jaho źjaŭlajucca imunahłabuliny G. Pry najaŭnaści padazreńniaŭ, źviazanych ź pieraniesienym u lohkaj formie zachvorvańniem, možna budzie prajści teściravańnie, kab paćvierdzić ich abo abvierhnuć.