Minzdaroŭja rastłumačyła, jak buduć naličvać abiacanyja premii miedykam. Ale ŭ ludziej usio adno zastajucca pytańni DAKUMIENT
U rasparadžeńni «Našaj Nivy» akazaŭsia tłumačalny dakumient Ministerstva achovy zdaroŭja, u jakim pryvodziacca pytańni i adkazy ab naličeńniach zarobakaŭ miedykam, jakija zaniatyja chvorymi z COVID-19.
Nahadajem, raniej paviedamlałasia pra adčuvalnyja dapłaty, ale «suraźmierna nahruzcy, ŭzroŭniu niebiaśpieki i adkaznaści».
Čytajcie: Daktaram ź infiekcyjnych adździaleńniaŭ buduć dapłačvać pa 1500 rubloŭ, reanimatołaham — pa 3000 rubloŭ
Pryvodzim tekst dakumienta całkam. Jaho skinuli ŭ zakryty čat telehram-kanała HARBACEVIČ.
Admietna, što pakul usio roŭna nie jasna, chto, jak i kolki atrymaje.
Daktary pierajmajucca, što dapłaty buduć za košt ich kaleh, niezaniatych u rabocie z chvorymi na karanavirus:
«U kaleh, jakija nie pracujuć z kavidnymi, — u adździaleńniach fizijaterapii i mied.reabilitacyi, naprykład, — zabirajuć staŭki i dapłaty», — skazaŭ nam palikliničny rabotnik.
Viciebski chirurh, časova pierakinuty na rabotu ź pnieŭmanijami, u kamientaryi «Našaj Nivie» adreahavaŭ davoli emacyjna.
«Mnie skazali, što kali chaču nadbaŭku, to treba pradastavić śpis pacyjentaŭ z COVID-19, da jakich ty vyjazdžaŭ, jakim rabiŭ apieracyi, kaho vioŭ, kamu rabiŭ ahlad z ukazańniem ahulnaha času, praviedzienaha z pacyjentam, i paćvierdžańniem hetaha času zapisami ŭ dakumientacyi.
I apłociać mnie pa časie, a nie adrazu za źmienu. Tamu mnie, kab heta ŭsio sabrać, treba stolki zdadzienych u archiŭ historyj chvarob pierašuflavać, što ažno vanituje.
Aproč taho, ci daduć mnie hetyja historyi ŭ inšych ustanovach? Da taho ž, u jakoj kolkaści ludziej na momant majho ahladu nie byli hatovyja testy, i ich vynikaŭ ja nie viedaju, kolki ja prosta nie ŭspomniu za hety miesiac? I kolki ŭ mianie zojmie času ŭsio heta sabrać, kali za minułyja čaćviora sutak ja nie na rabocie znachodziŭsia 17 hadzin?».
Minski terapieŭt skazaŭ nam, što vyhladaje prablemnym sabrać źviestki ab usich chvorych na karanavirus, bo daloka nie ŭsie tyja, chto prychodzić na pryjom, zdavali testy, ale majuć simptamatyku.
Jaki hrašovy vyhlad prymuć usie hetyja formuły i raźliki, my zmožam daviedacca ŭžo na nastupnym tydni, kali buduć pieršyja zarobki za krasavik.