«Bajusia ŭjavić, što budzie dalej». Žančyna, jakoj skazali pierazdać mazok na karonu, sutyknułasia z bałahanam u rajonnaj paliklinicy
Ilustracyjnaje fota: Nadzieja Bužan
«Dva tydni tamu pierasiekła miažu ŭ aŭtobusie, arhanizavanym biełaruskim kansulatam u Polščy, — napisała ŭ «Našu Nivu» čytačka. — Zapoŭniła kryva razdrukavanuju i napałovu niabačnuju ankietu z asabistymi danymi (dałučaju fota), uziali mazok na karanavirus va ŭsiaho aŭtobusa, kazali, što pieratelefanujuć na praciahu sutak, kali ŭ kahości vynik budzie stanoŭčy. Nie pieratelefanavali, ale praz 2 dni pazvaniła ŭčastkovaja miedsiastra z rajonnaj palikliniki i zaprasiła na paŭtorny test praz 14 dzion. Navat pryjemna ździviłasia, bo mienavita takuju schiemu raić Suśvietnaja arhanizacyja achovy zdaroŭja.
Z čystym sumleńniem paśla dvuchtydniovaj samaizalacyi siońnia pryjšła ŭ nazvany pakoj u infiekcyjnym adździaleńni. Miedpiersanał tam u maskach, ale ŭ niekatorych tyja maski panura źvisajuć, začeplenyja za vušy — niby jany jość, i navat nadzietyja, ale tołku?
Ja była druhaja ŭ čarzie. Pierad mnoj chvoraja žančyna ŭ mascy. Čakała chvilin 20, pakul jana vyjdzie.
Zachodžu ŭ kabiniet, raźminajusia ź miedsiastroj. Pytańnie z parohu: ci jość tempieratura? Adkazvaju: nie. Apaviadaju, čaho pryjšła. Doktar prosić pačakać za dźviaryma, pakul vierniecca miedsiastra, jakaja «pajšła vypisvać balničny», i voźmie mazok. Vychodžu, čakaju jašče 20 chvilin. Pryjom idzie dalej, čarha infiekcyjnaha adździaleńnia ruchajecca. Dumaju sabie: kali ja i nie chvoraja, to nie fakt, što niešta nie padčaplu tut. Prykładna toje kažu doktaru, kali sprabuju 2 razy na praciahu hetych 20 chvilin daviedacca, ci nie pajšła miedsiastra papić harbaty. U doktara, akazvajecca, niama jaje numaru telefona, jana idzie tuju šukać, viartajecca sa słovami «Zaraz prydzie, čakajcie». Čakaju.
Narešcie źjaŭlajecca. Sa słovami «Što tam takoje sročnaje?» zachodzić u kabiniet, vychodzić i da mianie — «Eta nie ka mnie». A da kaho? Pytajusia i znoŭ raskazvaju historyju, što pryjšła na paŭtorny mazok pa zaprašeńni z vašaj ža palikliniki.
Biare maju ambułatornuju kartku i źnikaje ŭ kalidory. Viartajecca praz 5 chvilin: «Idzicie ŭ kabiniet taki i taki, tam prymaje zahadčyca, ź joj usio vyśviatlajcie».
Pytajusia: Znoŭ čakać 40 chvilin u čarzie? «Tam niama čarhi».
Dobra, jedu liftam navierch. «Niama čarhi» aznačaje 15 smarkata-čychatych pad kabinietam. Zvaniu niepasredna da miedsiary, jakaja zaprasiła na test, dobra, što zachavała jaje numar, apaviadaju situjovinu. Čuju: «Idzicie da dziažurnaj miedsiastry, jana skaža, što rabić». Idu. Kaniečnie, začyniena. Sprabuju znoŭ prarvacca ŭ kabiniet, dzie prymaje zahadčyca, narod u čarzie aburajecca. Raptam pieratelefanoŭvaje miedsiastra: «Oj, nu ŭ nas pastajanna ŭsio mianiajecca, 2 dni tamu vyjšła novaja papierka: kali nie było nijakich prykmietaŭ chvaroby, to paŭtorna test nie zdajecca. Idzicie dadomu».
Binha! Pytańnie: adkul jana viedaje, ci byli prykmiety? A moža, pa hołasie vyznačyła?
KKD — zero + hadzina i 10 chvilin, praviedzienyja va ŭstanovie z kučaj chvorych ludiej. Usio, što treba viedać pra infarmavanaść i hatoŭnaść biełmiedycyny navat nie da krytyčnaj situacyi. Bajusia ŭjavić, što budzie dalej.