Biełaruskija nacboły zajavili pra napad na budynak rasijskaha pasolstva
Pres-słužba niezarehistravanaj Nacyjanał-balšavickaj partyi Biełarusi raźmiaściła ŭ interniecie infarmacyju ab "napadzie" nočču 11 sakavika na novy budynak pasolstva Rasii ŭ Minsku.Jon ŭzvodzicca ŭ rajonie Kamsamolskaha voziera kala Pałaca dziaciej i moładzi.
Aŭtary paviedamleńnia źviartajuć uvahu na toje, što budynkam hetaje zbudavańnie "nazvać možna ź ciažkaściu". "Jon bolš pachodzić na pałac hatelna-zabaŭlalnaha typu, jaki raźmiaščajecca na niezvyčajna vialikaj dla pasolstvaŭ u respublicy terytoryi, — havorycca ŭ paviedamleńni pres-słužby. — Zamoŭca, zrazumieła, RF. Ab`iekt chutka budzie zdadzieny ŭ ekspłuatacyju. U toj čas jak zvyčajnyja hramadzianie Rasii, jakija žyli i da kryzisu niebahata, a ciapier naohuł apynulisia ŭ katastrafičnaj situacyi, skuplajuć pradmiety pieršaj nieabchodnaści, kiraŭnictva RF paskoranymi tempami buduje sabie darahija pałacy".
Nacyjanał-balšaviki paviedamlajuć, što na ścieny novaha budynka rasijskaha pasolskaha byli naniesienyja farbaj łozunhi "suprać represiŭnaj palicejskaj dziaržavy, što sfarmavałasia ciapier u Rasii. Tym samym nacyjanał-balšaviki Biełarusi vykazalisia suprać taho, kab pasolski pałac dziaržavy RF znachodziŭsia na terytoryi Biełarusi".
Miarkujučy pa prykładzienych fatahrafijach, nadpis "Nie palicejskaj dziaržavie RF" razam z abrevijaturaj "NBP" i siarpom i mołatam u kruzienaniesieny nie na budynak pasolstva, a na elemienty aharodžy terytoryi budučaj dypmisii.
Ci źviartalisia rasijskija dypłamaty z zajavaj u milicyju ŭ suviazi z hetymi padziejami, BiełaPAN vyśvietlić pakul nie ŭdałosia. Dypłamat, jaki dziažuryŭ 14 sakavika, u vychadny dzień, nie zmoh adkazać na hetaje pytańnie. U dziažurnaj čaści Centralnaha RUUS dać takuju infarmacyju pa telefonie admovilisia.