Ministr infarmacyi: Uviadzieńnie identyfikacyi internet-prastoru bolej cnatlivaj nie zrabiła
Papraŭki ŭ zakon ab ŚMI, jakija patrabavali identyfikacyju kamientataraŭ na forumach, pracujuć, zajaviŭ ministr infarmacyi Alaksandr Karlukievič u intervju prahramie «Tydzień» telekanała STB.
«Ja liču, što hetaja norma pracuje. Pa-pieršaje, sami haspadary internet-prastory, haspadary peŭnych resursaŭ viedajuć charaktar znosin z tymi, chto vystupaje pad nikami albo pad svaim proźviščam u jakaści kamientataraŭ. I heta vielmi važna. I dziela hetaha — moža być, nie ŭsie čuli nas tady, niekotory čas nazad, — uvodziłasia heta norma. Jość parušalniki, ale jany ŭ bolšaj stupieni navat nie siarod kamientataraŭ, a siarod tych, chto raźmiaščaje naŭmysna tuju ci inšuju infarmacyju, jakaja nie adpaviadaje zakanadaŭstvu. I takija prykłady znosin ź imi jość», — miarkuje ministr.
Razam z tym jon ličyć, što bolš cnatlivaj internet-prastoru nie zrabili.
«Ja b tak nie skazaŭ, što stała mieniej abraz. Internet-prastoru bolej cnatlivaj novaje zakanadaŭstva nie zrabiła. Ale ŭ novym zakanadaŭstvie — ja havaryŭ heta pierad pryniaćciem, pierad vyłučeńniem hetych inicyjatyŭ — dziaržava i my jak orhan dziaržaŭnaha kiravańnia abaznačyli svaju pazicyju. Pryčym, heta pazicyja nie tolki naša, heta pazicyja zdarovych sił hramadstva», — miarkuje Aleś Karlukievič.