Baćka adkazvaje ŭ Maskoŭskim rajonie za budoŭlu, a syn pracuje ŭ kampanii, jakoj addali pad zabudovu Hrušaŭski skvier
U minskaj škole №3 prajšła sustreča namieśnika kiraŭnika Maskoŭskaha rajona Uładzimira Tankieviča i deputatki Pałaty pradstaŭnikoŭ Ludmiły Makarynaj-Kibak z žycharami Hrušaŭki pa pytańniach raźvićcia mikrarajona. Ale ludziej bolš chvalavaŭ los Hrušaŭskaha skviera, jaki ŭžo abharadzili i z dnia na dzień pačnuć vysiakać, piša Tut.by.
Pierad hetaj sustrečaj aktyvisty rajona sustrelisia z kiraŭnikom Savieta Respubliki Natallaj Kačanavaj, jakaja ciapier ŭpaŭnavažanaja pry prezidencie pa spravach ŭ Minsku. Miascovych chvalavała pytańnie zachavańnia Hrušaŭskaha skviera, častki jakoha jany mohuć pazbavicca z-za budaŭnictva šmatpaviarchovaha doma z padziemnaj parkoŭkaj «Hrand Chaus». Aktyvisty abhruntavali dakumientami parušeńni pry zabudovie. Kačanava paabiacała padniać papiery i razabracca, a taksama pabyvać na miescy asabista.
Raniej miascovyja ŭžo rabili sproby adstajać skvier. Vychodzili na akcyi, vyklikali milicyju na budaŭnikoŭ, jakija stavili płot, źviartalisia ŭ videazapisu da prezidenta.
Praz što aburanyja žychary Hrušaŭki?
Patłumačym koratka, što mienavita aburaje žycharoŭ rajona. Pa dziejučym prajekcie detalovaha płanavańnia nijakaj zabudovy na miescy skviera być nie pavinna, ale na kadastravaj karcie ŭžo adznačany ŭčastak pad budaŭnictva, jaki nasoŭvajecca na častku skviera.
Skrynšot z kadastravaj karty z vyłučanym učastkam pad «Hrand Chaŭs» dla «Datč Stara».
Taksama źvierniem uvahu na toje, jak vydavałasia dazvolnaja dakumientacyja.
Rašeńnie na budaŭnictva šmatpaviarchovika «Hrand Chaus» Minharvykankam padpisaŭ 29 listapada 2019 hoda. Zaklučeńnie dziaržaŭnaj ekśpiertyzy zabudoŭščyk atrymaŭ 5 śniežnia 2019 hoda. Pry hetym hramadskaha schodu pa hetym pytańni nie pravodziłasia. Prajekt, jaki źbiralisia vynosić na abmierkavańnie, u pačatku śniežnia adpravili na dapracoŭku. Pry hetym jašče ŭ listapadzie ŭ anonsie prezientacyi była schiema, dzie na Hrušeŭski skvier užo nasoŭvałasia zabudova. Prajekt da hetaha času niedapracavany i nie pradstaŭleny na prezientacyju.
Skrynšot z apublikavanaha raniej Prajekta detalovaha płanavańnia (PDP), dzie B1-2 — učastak pad «Hrand Chaus», a B1-3 — skvier.
Pytańni ad žycharoŭ i adkazy ad Tankieviča
Uviečary, užo na sustrečy z namieśnikam kiraŭnika Administracyi Maskoŭskaha rajona, było šmatludna. U zale ledź źmiaściłasia kala sotni čałaviek. Intaresy miascovych žycharoŭ pradstaŭlaŭ aktyvist, jaki pieršym zadaŭ pytańni čynoŭniku i pakazaŭ na prablemy.
Voś jaho tezisy i pytańni.
- Pavodle zakona «Ab raślinnym śviecie», da zaćviardžeńnia schiemy azielanieńnia terytoryj zabaroniena pamianšać ich płošču, asabliva kali ŭ rajonie nie vykonvajecca narmatyŭ zabiaśpiečanaści zialonymi terytoryjami ahulnaha pryznačeńnia (dla rajonnaha maštabu heta 8-10 «kvadrataŭ» na čałavieka). A ŭ miežach rajona zabudovy pa praśpiekcie Dziaržynskaha, vulicach Žukava i Čyhunačnaj hety paramietr — 1,2 «kvadrata».
- U 2012 hodzie Hrušaŭski skvier płoščaj 2,16 hiektara pieradali «Zielanbudu». Na praciahu hoda jany pavinny byli stvaryć pašpart skviera (u jaho ŭvachodzić pracoŭny dziońnik i płan azielanieńnia terytoryj). Pašpart abnaŭlajecca nie radziej za raz na piać hadoŭ. Ale pašpartu niama da hetaha času, jon tolki raspracoŭvajecca.
-
Niezrazumieła, na padstavie čaho dla zabudovy pieradali častku skviera, kali ŭ jaho niama pašparta, a značyć, — niama dakładnych miežaŭ. Akramia taho, da hetaha času dziejničaje PDP ad 2004 hoda.
- Čamu źnieśli kinateatr «Avanhrad», kali dziejučy PDP praduhledžvaje rekanstrukcyju.
- Akramia hetaha, u dakumientach źmianiajucca i miežy skviera.
Na hetyja i inšyja pytańni Tankievič šmat razoŭ za sustreču adkazvaŭ tak:
«Dziaržaŭnaja ekśpiertyza pravieryła ŭsie techničnyja i narmatyŭnyja akty i dała stanoŭčyja zaklučeńni. Biez najaŭnaści dakumientaŭ i adpaviednaści ekśpiertyzy b hetaha nie było. U mianie niama prava sumniavacca ŭ hetym dakumiencie, u mianie niama prava jaho praviarać».
Ludzi na heta reahavali burna. Adny kryčali: «zakanadaŭstva ŭ nas nichto nie vykonvaje — ni vy, ni Hałoŭbudekśpiertyza!», a inšyja: «Heta ž złačynstva!».
Ale pa sutnaści adkazy na nabalełyja pytańni ab Hrušaŭskim skviery ludzi tak i nie pačuli.
Dapracoŭki ŭ PDP, kampiensacyjnyja pasadki, syn Tankieviča ŭ «Datč Stary»
Dapracoŭki ŭ PDP, pa słovach Tankieviča, jašče buduć razhladacca na novym hramadskim abmierkavańni.
Adzinaje, što zmoh prakamientavać čynoŭnik — heta płan pa kampiensacyjnych pasadak. U miežach, adviedzienych dla «Datč Stara», zachavajuć 34 dreva, pierasadziać 15 drevaŭ, 40 źniščać — ź ich 6 starych tapolaŭ, 18 — avaryjnych.
Zabudoŭščyk abaviazany budzie vysadzić 120 dreŭ. Pa słovach Tankieviča, — u skviery.
Niekatoryja ludzi taksama pytalisia, jak akazałasia, što syn Uładzimira Tankieviča pracuje ŭ kampanii «Datč Star». Čynoŭnik zajaviŭ, što heta jaho asabistaje žyćcio i admoviŭsia kamientavać situacyju.
Pierśpiektyvy rajona, abiacanyja administracyjaj
Ludziej cikavili i inšyja pytańni: nieŭładkavanaść infrastruktury ŭ hustanasielenym rajonie, niaŭładkavanaść, doŭhija abiacańni znosu damoŭ, praź jakija nielha zrabić ramont, situacyja ź dziciačymi sadkami.
U adpaviednaści ź pierśpiektyŭnym płanam u rajonie źjaviacca try dziciačyja sadki:
- na vulicy Ščorsa,
- na Hrušaŭskaj — dzie znachodzicca škoła №105, u jakoj projdzie rekanstrukcyja,
- na Papanina — na miescy kinateatra «Avanhard».
Zakazčyk budaŭnictva znajšli tolki na apošni ŭčastak — heta budzie «Datč Star». Pačać budoŭlu płanujuć u 2020-m, a skončyć u 2023 hodzie.
Novuju škołu na 1020 miescaŭ z basiejnam pabudujuć u 2024 hodzie na vulicy Razinskaj. Pakul viaducca prajektnyja pracy, zakazčykam budaŭnictva pryznačany «UKB Zachad».
Paśla taho, jak zdaduć novy abjekt, rekanstrujujuć škoły №105 i №3.
Na skryžavańni vulic Ščorsa i Hrušaŭskaj pabudujuć palikliniku. Handlovy centr uźviaduć na vulicy Parašutnaj — pad jaho źniasuć dva baraki, placoŭka sydzie praz aŭkcyjon.