Niaŭradavyja arhanizacyi praviali ŭ Minsku asambleju
pieršuju paśla 4-hadovaha pierapynku.
pieršuju paśla 4-hadovaha pierapynku.
Za apošnija hady situacyja ŭ trecim siektary Biełarusi krychu palepšyłasia, adnak nieabchodna vyrašyć jašče šmat prablem. Takuju dumku vykazaŭ juryst i palitołah Juryj Čavusaŭ, vystupajučy z dakładam na Asamblei niaŭradavych arhanizacyj 6 sakavika ŭ Minsku.
U pryvatnaści, zaznačyŭ Čavusaŭ, u apošnija hady «stała mienš aktyŭnaj kampanija pa likvidacyi hramadskich abjadnańniaŭ». «U 2007—2008 hadach hučnych likvidacyj hramadskich arhanizacyj nie było. Naadvarot, byli vypadki, kali Ministerstva justycyi, padaŭšy iski na likvidacyju arhanizacyj, adklikała ich. Naprykład, tak adbyłosia ź Biełaruskim Chielsinkskim kamitetam», — skazaŭ juryst.
Jon taksama zaznačyŭ, što ŭ čatyrochhadovy pieryjad z momantu praviadzieńnia papiaredniaj asamblei byŭ pryniaty novy zakon ab hramadskich abjadnańniach. «Mnohija, u tym liku ja, pabojvalisia, što hety zakon stanie «rasstrelnym» dla NUA i pad markaj uniasieńnia źmianieńniaŭ u statuty arhanizacyj mnohim ź ich budzie admoŭlena ŭ rehistracyi. Adnak našy apasieńni, na ščaście, nie apraŭdalisia: pierarehistracyja prajšła ŭ asnoŭnym spakojna», — skazaŭ Čavusaŭ.
Siarod stanoŭčych źmien jon adznačyŭ i toje, što Ministerstva justycyi stała vytrymlivać naležny pa zakonie miesiačny termin dla adkazu na zajavy ab rehistracyi novych NUA.
«Samaja vialikaja prablema — rehistracyja hramadskich abjadnańniaŭ. My navat vyrašyli pravieści test: uziali dzieviać niezarehistravanych arhanizacyj samaj roznaj skiravanaści i pasprabavali ich zarehistravać. Vosiem ź ich, tak ci inakš, praz paŭtornuju padaču dakumientaŭ, praz vypraŭleńnie pamyłak, praz sudy, ale atrymali rehistracyju. Tak što ciapier rehistracyjny barjer stanovicca pieraadolnym», — kanstatavaŭ Čavusaŭ.
Razam z tym, zaznačyŭ jon, hałoŭnym kryteryjem dla rašeńnia ab rehistracyi abo nierehistracyi NUA źjaŭlajecca palityčny faktar. «Kali ŭ Miniuście bačać u śpisach zasnavalnikaŭ hramadskaj arhanizacyi ludziej, jakija aktyŭna ŭdzielničali ŭ palityčnaj dziejnaści, jarkich apanientaŭ ułady, to pry rehistracyi ŭźnieikajuć vialikija ciažkaści», — skazaŭ juryst.
Pavodle jaho słoŭ, treciamu siektaru treba budzie vyrašyć jašče vielmi šmat prablem. «Letaś byli admienieny panižalnyja kaeficyjenty arendy dla niaŭradavych arhanizacyj, sumy arendy ofisa stali dla mnohich niepadjomnymi. Zastajecca aktualnaj prablema sponsarskaj dapamohi — faktyčna jana zabaroniena. Značna pahoršyłasia situacyja z rehistracyjaj fondaŭ u Biełarusi», — zajaviŭ Juryj Čavusaŭ.
Na siońnia Asambleja niaŭradavych arhanizacyj źjaŭlajecca niezarehistravanym abjadnańniem. 7 lutaha 2009 hoda prajšoŭ ustanoŭčy źjezd asacyjacyi «Asambleja niaŭradavych demakratyčnych arhanizacyj». 6 sakavika dakumienty na rehistracyju asacyjacyi padadzieny ŭ Ministerstva justycyi.