Kanapackaja prapanuje Łukašenku niedatykalnaść, 75% ad zarobku i adnu rezidencyju va ŭłasnaść
Deputatka Pałaty pradstaŭnikoŭ Hanna Kanapackaja naprykancy svajoj kadencyi prapanavała prajekt zakona «Ab harantyjach prezidentu Respubliki Biełaruś, jaki spyniŭ vykanańnie svaich paŭnamoctvaŭ, i členam jaho siamji».
Takim čynam, prajekt zakonu ad Hanny Kanapackaj pastupiŭ na razhlad u Pałatu pradstaŭnikoŭ. Što prapanuje deputatka?
- Pažyćciovuju achovu dla byłoha prezidenta
- Miedycynskaje absłuhoŭvańnie na ŭzroŭni času znachodžańnia pry ŭładzie
- Strachavańnie zdaroŭja i žyćcia za košt dziaržaŭnaha biudžetu
- Niedatykalnaść byłoha prezidenta, honar i hodnaść abaraniajecca zakonam
- Były prezident nie moža być pryciahnuty da kryminalnaj ci administracyjnaj adkaznaści za dziejańni, jakija ździejśniŭ padčas znachodžańnia na pasadzie prezidenta
- Nie moža być padvierhnuty dopytu, vobšuku ci asabistamu nadhladu pa spravach, źviazanych z vykanańniem abaviazkaŭ prezidenta Biełarusi
- Niedatykalnaści moža być pazbaŭleny ŭ suviazi z zaviadzieńniem kryminalnaj spravy za ciažkoje złačynstva
- Były prezident maje prava na 75% ad zarobku, jaki jon atrymlivaŭ padčas znachodžańnia na pasadzie
- U pažyćciovaje karystańnie pradstaŭlajecca adna z rezidencyj
- Maje prava na biaspłatnuju ŭradavuju suviaź
- Maje prava za košt biudžetu ŭtrymlivać aparat pamočnikaŭ
U kamientary dla «Našaj Nivy» Hanna Kanapackaja patłumačyła, što zakonaprajekt prapanavany tolki ciapier, bo padrychtoŭka dakumienta — heta «dastatkova zabiurakratyzavany praces». I tolki ciapier hety prajekt zakona prajšoŭ pravierku i atrymaŭ adpaviednyja zaklučeńni.
Ciapier usio hatova da taho, kab hety zakonaprajekt byŭ pryniaty jašče starym sklikańniem parłamienta, ale sama deputatka nie zahadvaje, ci adbudziecca heta ŭžo tak chutka.
Što tyčycca niedatykalnaści dla prezidenta, to Kanapackaja nazyvaje heta «ahulnasuśvietnaj praktykaj, jakaja zasnavanaja na demakratyčnych kaštoŭnaściach, prychilnicaj jakich ja źjaŭlajusia». «Tam prapisanyja ŭsie varyjanty, u tym liku i pryciahnieńnia da adkaznaści», — kaža Kanapackaja.
«Ja nie kamientuju čutki i zdahadki. Ja viedaju tolki toje, što ja napisała. Heta dakumient zasnavany na Kanstytucyi našaj krainy, a taksama mižnarodnych dakumientach», — raskazvaje deputatka.
Ci źjaŭlajecca ahulnaj normaj pakidańnie za byłym prezidentam adnoj z rezidencyj? «Heta maje prapanovy, jany mohuć być źmienienyja», — adkazała Kanapackaja.