Jarmošyna ab zahonie studentaŭ na ŭčastki: Heta vychavańnie infantylnaha maładoha pakaleńnia
Fota z sajta Minsk-naviny
Kiraŭnik CVK Lidzija Jarmošyna admaŭlaje, što ŭ krainie adbyvajecca masavy prymus studentaŭ z boku kiraŭnictva VNU prahałasavać daterminova. Pavodle jaje słoŭ, studentaŭ nie zahaniajuć na ŭčastki, a nastojliva prosiać prahałasavać daterminova, piša Tut.by.
— Usio toje, pra što paviedamlajecca, heta nie zahon, a ahitacyja — nastojlivaje zaprašeńnie pryjści na ŭčastak. Zahon — heta tady, kali isnuje prymus, kali ŭ dačynieńni da ludziej prymianiajecca pahroza. Kali pahrozy niama, heta ŭsiaho tolki ahitacyja, — zajaviła Jarmošyna.
Z vypadkami, kali studentam pahražajuć nie vydzielić miesca ŭ internacie, kali jany nie prahałasujuć daterminova, treba raźbiracca asobna, ličyć kiraŭnik CVK.
— U takim vypadku možna kazać pra prymus. Kali prosta nastojlivaje zaprašeńnie, a ja čytała mienavita pra heta, to heta nie bolš i nie mienš, jak prosta ahitacyja za ŭdzieł u vybarach. Heta vychavańnie infantylnaha maładoha pakaleńnia, ź ich robiać sapraŭdnych adkaznych hramadzian. Pahrozy niezakonnyja, zaprašeńni — zakonnyja, — skazała Jarmošyna.