Novy prysud pa «spravie miedykaŭ». Eks-namieśniku ministra achovy zdaroŭja dali šeść hadoŭ
Sud Savieckaha rajona Minska prysudziŭ byłoha namieśnika ministra achovy zdaroŭja Valeryja Šaŭčuka da šaści hadoŭ pazbaŭleńnia voli va ŭmovach uzmocnienaha režymu, piša Tut.by.
Valeryja Šaŭčuka pryznali vinavatym pa č. 3 art. 430 KK (Atrymańnie chabaru ŭ asabliva bujnym pamiery) i pa č. 1, 2 art. 209 KK (Machlarstva). Taksama jon nie zmoža zajmać pasady, źviazanyja z vykanańniem arhanizacyjna-rasparadčych i administracyjna-haspadarčych abaviazkaŭ na praciahu piaci hadoŭ.
Šaŭčuka zatrymali 25 lutaha 2019 hoda. Spačatku jaho vinavacili tolki pa č. 3 art. 430 KK (Atrymańnie chabaru ŭ asabliva bujnym pamiery), ale ŭžo ŭ časie pracesu prakuror pradjaviŭ novaje abvinavačańnie — dadałasia č. 1, 2 art. 209 KK (Machlarstva).
Byłoha namieśnika ministra achovy zdaroŭja abvinavačvali ŭ tym, što ad Łarysy Rubcovaj jon atrymaŭ iPhone 5 i skurany partfiel. Bok abvinavačvańnia rascaniŭ heta jak machlarstva, bo Šaŭčuk nie źbiraŭsia nikomu dapamahać, a padarunki ŭsio roŭna pryniaŭ. A voś nastolny nabor z marmuru i dźvie tysiačy dalaraŭ, na dumku prakurora, heta ŭžo chabar. Atrymaŭšy jaho, abvinavačany ŭzhadniŭ namienkłaturu kampanii «Stymenierdžy» na fasoŭku i ŭpakoŭku lekavych srodkaŭ, jakaja naležyć mužu Rubcovaj.