Biełaruska, jakaja vyvučała astranomiju pa-biełarusku, pieramahła na mižnarodnaj alimpijadzie pa astrafizicy
lyceum.by
Minčanka Mirasłava Bułhakava ŭvajšła ŭ lik pieramožcaŭ Mižnarodnaj alimpijady pa astranomii i astrafizicy. Jana viartajecca na radzimu z bronzavym miedalom, paviedamiŭ jaje nastaŭnik Viktar Małyščyc.
Bułhakava navučałasia ŭ Licei Biełaruskaha dziaržaŭnaha ŭniviersiteta. Małyščyc vykładaje svoj pradmiet pa-biełarusku.
«Miedal Mirasłavy — adziny sioleta ŭ biełaruskaj kamandzie. A vy dalej kažycie, što pa-biełarusku fiziku i astranomiju vyvučać niemahčyma», — žartuje nastaŭnik.
Alimpijada prajšła z 2 da 10 žniŭnia ŭ horadzie Kiesthiej (Keszthely), što ŭ Vienhryi na voziery Bałaton.
Mirasłava Bułhakava — dačka viadomaha biełaruskaha fiłosafa i vydaŭca Valera Bułhakava.
Jak pieramožca nacyjanalnaj alimpijady, Mirasłava pastupiła biez ekzamienaŭ u Biełaruski dziaržaŭny ŭniviersitet.