ZŠA aktyvizavali ataki na enierhasistemy RF. Tramp aburyŭsia
Administracyja Złučanych Štataŭ aktyvizavała sproby ŭkaranić škodnyja prahramy ŭ kampjutarnyja sistemy, jakija adkazvajuć za enierhazabieśpiačeńnie Rasii. Pra heta piša The New York Times sa spasyłkaj na byłych i dziejsnych čynoŭnikaŭ Biełaha doma.
Ščyt kiravańnia Leninhradskaj AES. Fota RIA Novosti archive / wikimedia.org
Pa źviestkach haziety, ZŠA ažyćciaŭlajuć padobnyja sproby z 2012 hoda, kali, pa słovach krynic, Złučanyja Štaty ŭstalavali vyviedvalnyja zondy ŭ sistemach kiravańnia rasijskich elektrasietak.
Adnak ciapier, pa śviedčańni čynoŭnikaŭ Biełaha doma, amierykanskaja stratehija «zrušyłasia ŭ bok raźmiaščeńnia patencyjna niebiaśpiečnaha škodnaha PZ ŭnutry rasijskaj sistemy na takuju hłybiniu i z takoj ahresiŭnaściu, jakija raniej nikoli nie vykarystoŭvalisia».
«Častkova hetyja dziejańni majuć metaj papiaredžańnie (dla Rasii), častkova — padrychtoŭku da praviadzieńnia kibierataki ŭ vypadku ŭźniknieńnia bujnoha kanfliktu pamiž Vašynhtonam i Maskvoj», — havorycca ŭ materyjale NYT.
U administracyi Trampa admovilisia apisać kankretnyja dziejańni, što prymajucca ŭ hetaj śfiery, adnak u svaim publičnym vystupie savietnik prezidenta ZŠA pa nacbiaśpieki Džon Bołtan zajaviŭ, što Złučanyja Štaty «bolš šyroka razhladajuć patencyjnyja ličbavyja mety jak elemient sproby «skazać Rasii ci kamu-niebudź jašče, chto zajmajecca kibierapieracyjami suprać ZŠA: «Vy zapłacicie za heta».
U svaju čarhu prezident ZŠA Donald Tramp u svaim tvitary adreahavaŭ na publikacyju vydańnia, nazvaŭšy jaje «zdradaj» i «chłuśnioj».
«Heta virtualny akt zdrady z boku niekali vialikaj haziety, jakaja adčajna šukaje… luby materyjał, navat kali jon škodny dla našaj krainy. I, akramia taho, heta niapraŭda », — zajaviŭ Tramp.