Abvieščana žury premii Arsieńnievaj. Praciahvajecca pryjom zajavak
Stali viadomyja imiony siabraŭ žury, jakija buduć abirać łaŭreata sioletniaj premii imia Natalli Arsieńnievaj za najlepšuju biełaruskamoŭnuju paetyčnuju knihu.
Skład žury:
Dźmitry Strocaŭ — paet, stvaralnik almanachu «Minskaja škoła», arhanizatar litaraturnych mierapryjemstvaŭ;
Lera Som — paetka, bard, vykładčyca biełaruskaj movy i litaratury;
Anžeła Mielnikava — litaraturaznaŭca, doktar fiłałahičnych navuk, vykładčyca;
Michaił Baranoŭski — paet, zahadčyk litaraturnaha muzieja Maksima Bahdanoviča;
Maryjana Kijanoŭskaja — paetka, pierakładčyca, krytyk, litaraturaznaŭca.
Pryjom zajavak doŭžycca da 14 červienia. Kab padać zajaŭku, zapoŭnicie formu. Kali kniha vydavałasia ŭ papiarovym vyhladzie, dva papiarovyja asobniki treba pieradać u Sajuz biełaruskich piśmieńnikaŭ (Minsk, vuł. Kuźmy Čornaha, 31-906).
Premija za najlepšuju knihu paezii była zasnavanaja ŭ 2017 hodzie ŭ honar Natalli Arsieńnievaj — vybitnaj biełaruskaj paetki, zorki litaratury Zachodniaj Biełarusi, aŭtarki znakavaha vierša «Mahutny Boža». Paśla vajny Arsieńnieva apynułasia ŭ emihracyi, dzie praciahvała zajmacca biełaruskaj spravaj, udzielničała ŭ kulturnaj i aśvietnickaj dziejnaści.
U 2018 hodzie premiju atrymaŭ Aleś Razanaŭ za knihu «Pieravybranaje», a ŭ 2017 — Uładzimir Niaklajeŭ za knihu «Tolki vieršy».
Arhanizatarami premii źjaŭlajucca Sajuz biełaruskich piśmieńnikaŭ, Biełaruski PEN-centr i Zhurtavańnie «Baćkaŭščyna». Sačyć za navinami premii Natalli Arsieńnievaj možna na staroncy ŭ Facebook.