U Biełaruś jedzie vunderkind: chto taki Siebaśćian Kurc, jaki staŭ kiraŭnikom Aŭstryi ŭ 31 hod
Kurc sa svajoj siabroŭkaj Zuzanaj Cir. Jana pracuje ŭ Ministerstvie finansaŭ krainy. Fota nachrichten.at.
U Aŭstryi kiruje vykanaŭčaj uładaj nie prezident, a kancler.
Funkcyi prezidenta simvaličnyja, reprezientatyŭnyja, a kancler — heta anałah premjer-ministra ŭ bolšaści krain. Kanclera abiraje parłamient, ciapier u im bolšaść maje pravacentrysckaja, chryścijanska-kansiervatyŭnaja Narodnaja partyja, urad jana sfarmiravała razam z pravymi nacyjanalistami z Partyi svabody. Narodnaja partyja kansiervatyŭnaja ŭ pytańniach marali i ekanomiki, ale nie ŭ kadravych.
Z 2017 hoda krainaj kiruje Siebaśćian Kurc, jon staŭ kancleram u 31 hod.
Kurc staŭ najmaładziejšym kiraŭnikom dziaržavy ŭ Jeŭropie. Dla paraŭnańnia: prezidentu Francyi Emaniuelu Makronu — 41, a prezidentu Biełarusi — 64. Roŭna ŭdvaja bolš, čym Kurcu.
Aŭstryjskija narodniki svaimi pohladami padobnyja da niamieckich chryścijanskich demakrataŭ. Ale asabisty styl Kurca mocna roźnicca ad Mierkiel: jon bolšy papulist i da mihracyi stavicca niehatyŭna,
jak i bolšaść aŭstryjcaŭ, zrešty. Na vybarach 2017 hoda partyja Kurca nabrała kala 32% hałasoŭ. U sacyjalistaŭ — 27%. Ultrapravaja, ź simpatyjami da Pucina, Partyja svabody sabrała 26%.
Darečy, Aŭstryja na siońnia ličycca samaj prarasijskaj krainaj Jeŭrasajuza i vystupaje za źniaćcio sankcyj z Kramla, uviedzienych za anieksiju Kryma i ahresiju na Danbasie.
Sustreča Kurca z Łukašenkam budzie nie pieršaj. Raniej Kurc zajmaŭ pasadu ministra pa pytańniach Jeŭropy, intehracyi i zamiežnych spraŭ krainy. Na hetaj pasadzie jon u 2015 hodzie ŭžo naviedvaŭ Biełaruś.
Kurc naradziŭsia ŭ 1986 hodzie ŭ Vienie ŭ siamji inžyniera i nastaŭnicy. Adrazu paśla škoły pajšoŭ adsłužyć terminovuju słužbu ŭ vojsku (Aŭstryja — siarod tych jeŭrapiejskich krain, jakija nie admovilisia ad pryzyvu). Paśla słužby pastupiŭ na jurfak Vienskaha ŭniviersiteta.
U Aŭstryjskuju narodnuju partyju Kurc ustupiŭ u 17 hadoŭ. A ŭ 23 hady, studentam, staŭ lidaram moładzievaha kryła ANP. U krasaviku 2011 Kurc staŭ dziaržaŭnym sakratarom pa spravach intehracyi, a praz dva hady, u 26 hadoŭ, uznačaliŭ aŭstryjskaje Ministerstva zamiežnych spraŭ.
Cikavy fakt, na momant pryznačeńnia ministram Siebaśćian Kurc jašče źjaŭlaŭsia studentam i nie mieŭ skončanaj vyšejšaj adukacyi. Jon byŭ vymušany pakinuć univiersitet na 13-m siemiestry, nie davučyŭšysia da dypłoma.