Niečakana: dziaržava zapłacić pravaabaroncu Andreju Bandarenku kampiensacyju 7500 rubloŭ
Bandarenka atrymaje kampiensacyju za toje, što ŭ 2016 hodzie na jaho zaviali kryminalnuju spravu.
Sprava była zaviedzienaja, kali Bandarenka adbyvaŭ termin u kałonii. U 2014 hodzie jon byŭ asudžany za chulihanstva, u spravie było try epizody: bojka kala kaviarni, svarka z susiedkaj i ŭdar, jaki Bandarenka nanios maci susiedki. Sam mužčyna nazyvaŭ spravu sfabrykavanaj.
U vyniku Bandarenku prysudzili 3 hady kałonii. Padčas adbyvańnia pakarańnia na jaho zaviali novuju spravu — za niepadparadkavańnie patrabavańniam administracyi kałonii. Praŭda, paźniej Bandarenku pryznali nievinavatym. Tady jon źviarnuŭsia ŭ sud, kab atrymać kampiensacyju, bo «paciarpieŭ ad dziejańniaŭ śledčych».
Spačatku sud u Mahilovie admaŭlaŭ Bandarenku ŭ pravie na kampiensacyju škody, rašeńnie padtrymaŭ i Viarchoŭny sud.
Ale ŭ žniŭni 2018 hoda namieśnik staršyni Viarchoŭnaha suda ŭkazaŭ, što kampiensacyja majomasnaj škody pa takich spravach adbyvajecca ŭ paradku hramadzianskaj sudovaj vytvorčaści (adkaznaść za pryčynienuju hramadzianinu škodu ŭ vyniku niezakonnaha pryciahnieńnia ŭ jakaści abvinavačanaha praduhledžana č.1 art. 939 Hramadzianskaha Kodeksa Respubliki Biełaruś).
Takim čynam, 8 studzienia sud Maskoŭskaha rajona Minska vyrašyŭ zadavolić patrabavańni Bandarenki. Rašeńnie ŭžo ŭstupiła ŭ siłu, nieŭzabavie kampiensacyja pamieram 7500 rubloŭ budzie vypłačanaja.