«Niaŭžo kamuści ŭ Rasii Ukrainy nie chapaje» — Łukašenka asudziŭ sproby sutyknuć biełarusaŭ z rasijanami
Alaksandr Łukašenka ŭpeŭnieny ŭ tym, što sutyknuć biełarusaŭ i rasijan nie atrymajecca, niahledziačy na asobnyja sproby ŭ hetym kirunku.
Pra heta jon zajaviŭ siońnia na sustrečy napiaredadni 100-hodździa biełaruskaj dypłamatyčnaj słužby, na jakoj prysutničali ministry zamiežnych spraŭ, što ŭ rozny čas uznačalvali MZS Biełarusi, piša BiełTA.
«U apošni čas (vy, napeŭna, čujecie) i mianie, i asabliva Uładzimira Uładzimiraviča Makieja abvinavačvajuć nie ŭ tym kursie, jaki my pravodzim u zamiežnaj palitycy. Našy braty rasijanie havorać, što my ŭžo zanadta prazachodnija. Na Zachadzie nas krytykujuć za zališni kren u bok Rasijskaj Fiederacyi», — adznačyŭ kiraŭnik dziaržavy.
Łukašenka raspavioŭ pra toje, što jaho asabliva tryvožyć, i, pavodle jaho słoŭ, sprava nie ŭ padatkovym manieŭry, jaki pravodzicca ŭ naftavaj śfiery Rasii. «Pieražyviom my jaho.
Mnie nie zusim zrazumiełyja (dumaju, pryjdziecca zadać pytańni kiraŭnictvu Rasii) niekalki atak na Biełaruś u ŚMI. Niachaj navobmacak pakul, ale typu taho: «Baćka-1», «Baćka-2», «Baćka- 3»… Ale kali tady jany ŭ mianie chacieli znajści niejkija hrošy i zabrać. Niachaj znojduć i zabiaruć. Ja absalutna čysty i sumlenny pierad vami. Naściarožvaje toje, što jany sprabujuć nas užo sutyknuć z rasijanami», - zajaviŭ jon.
U hetych adnosinach kiraŭnik dziaržavy zhadaŭ vypadak, jaki atrymaŭ rozłahas u internecie, a zatym byŭ vykarystany ŭ rasijskich ŚMI ŭ jakaści sproby prailustravać napadki na ruskich ludziej u Biełarusi.
«Vy viedajecie ŭ internecie hety vypadak, kali niechta ŭ mietro zładziŭ kanflikt ź niejkim čałaviekam, i ŭsio heta chucieńka było padniesiena (jak byccam z Rasii zamovili) jak toje, što ŭ nas ździajśniajucca napadki na ruskich ludziej. Kali ja pračytaŭ heta, nieadkładna daručyŭ razabracca. Ja razumieju, što ŭsiakija mohuć być vypadki. Akazvajecca, tam ruskimi, jak jany kažuć, i nie pachła. Heta kanflikt dvuch biełarusaŭ. Inakš nie skažaš. Prytym jon chutka byŭ źniaty na videa (ciapier heta prosta robicca) i ukinuty ŭ internet. I jany (rasijskija ŚMI) za heta uchapilisia. Akazvajecca, adzin biełarus, jaki kaliści byŭ asudžany (supracoŭnik AMAPa, za chabar byŭ pasadžany, vyjšaŭ z turmy). Druhi byŭ taksama biełarus paŭadmarožany. I zaviazałasia bojka. Pryčym tut ruskija?!» - raspavioŭ padrabiaznaści taho, što adbyłosia, Alaksandr Łukašenka.
«Ja heta kažu da taho, kab vy razumieli maju pazicyju: nas nie atrymajecca sutyknuć — biełarusaŭ z rasijanami. Nie tolki z ruskimi. Naohuł z rasijanami. Heta nie toj šlach, kab niejak atrymać u Rasii kamuści ad hetaha dyvidendy. Nie atrymajecca. Ja ŭžo hruba kazaŭ kaliści: my sami ruskija, nas niemahčyma sutyknuć adzin z adnym, biełarus — heta ruski sa znakam jakaści (ja jašče 20 ź lišnim hadoŭ tamu skazaŭ). Na hetaj temie pahulać - heta vielmi niebiaśpiečna», - padkreśliŭ kiraŭnik dziaržavy.
«Ja časam zadaju hetaje pytańnie sam sabie, ale siońnia skažu publična: niaŭžo kamuści ŭ Rasii Ukrainy nie chapaje? Niaŭžo treba abaviazkova stvaryć prablemu na roŭnym miescy? Nu niama ŭ vas mahčymaści kampiensavać nam straty ad hetaha padatkovaha manieŭru. Haspodź z vami.
My ž u vas nie adbirajem vaš tavar. Handlujecie vy naftaj, hazam, jakija hospad tudy pakłaŭ u nietry, i śvidraviny my buryli ŭ svoj čas. Uładzimiru Uładzimiraviču (Pucina) pra heta kazaŭ na apošniaj sustrečy. Kažu: nie zabyvaj, u tyja savieckija časy, kali my pad stoł z taboj chadzili, adsiul (ź Biełarusi) lotali čartary, i vachtavym mietadam buryli śvidraviny — naftavyja i hazavyja. I jany siońnia jašče pracujuć», - zajaviŭ biełaruski kiraŭnik.
Pry hetym Alaksandr Łukašenka źviarnuŭ uvahu, što Biełaruś nie prosić hrošaj, a nastojvaje na roŭnych umovach.
«My ŭ stanie ich (hrošy) zarabić. Kali my stvaryli ahulny rynak, my, nievialikaja kraina, i hihant Rasija. Vy što, baiciesia kankurencyi? Davajcie na hetym rynku kankuravać. Nie - treba pałki ŭ koły. Pa-druhoje, usie dahavory, jakija my padpisvali … my što patrabavali - roŭnych umoŭ. Dzie hetyja roŭnyja ŭmovy? Voś adzinaje, što my patrabujem. Na ich pryncypach kankurencyja. Jany (rasiejski bok) bolš prasunutyja ŭ rynku. i roŭnyja ŭmovy dla subjektaŭ haspadarańnia i ludziej. i my svajo ščaście budziem šukać na roŭnych umovach», - skazaŭ jon.
Što da sprobaŭ sutyknuć biełarusaŭ z rasijanami, Łukašenka jašče raz padkreśliŭ, što heta niedapuščalna i moža pryvieści da eskałacyi situacyi.
«Kali tolki heta tema stanovicca aktualnaj, asabliva ŭ rasijskich ŚMI, to zaŭtra navat kali ŭ Biełarusi nie budzie admarozkaŭ, jakija buduć bić ruskich, nam ich padkinuć. Vy viedajecie - ź luboj krainy nam ich padkinuć, kab hetyja videa ŭvieś čas byli ŭ internecie. A jany ź internetu, nie razabraŭšysia, buduć ukidvać na asnoŭnyja kanały ŭ Rasii. Voś u čym niebiaśpieka - eskałacyi hetaha pracesu «, - ličyć kiraŭnik dziaržavy.
Heta nie projdzie ŭ Biełarusi, nie atrymajecca. A kali, nie daj boh, takija fakty buduć, žestačajšaja budzie reakcyja. Pravaachoŭnyja orhany atrymali adpaviednaje ŭkazańnie spyniać padobnyja rečy samym žorstkim čynam i raźbiracca», - reziumavaŭ biełaruski kiraŭnik.