«Kryštal» Darji Žuk nie ŭvajšoŭ u šort-list «Oskara»
«Kryštal» Darji Žuk, vyłučany Biełaruśsiu na «Oskar», nie ŭvajšoŭ u šort-list pretendentaŭ na kinapremiju ŭ katehoryi «Najlepšy film na zamiežnaj movie».
Jak paviedamlajecca na sajcie Amierykanskaj akademii kinamastactvaŭ, u 2019 hodzie za premiju ŭ hetaj naminacyi buduć zmahacca dzieviać filmaŭ:
«Pieralotnyja ptuški» (Kałumbija)
«Vinavaty» (Danija)
«Praca biez aŭtarstva» (Hiermanija)
«Šopliftary» (Japonija)
«Ajka» (Kazachstan)
«Kapiernaum» (Livan)
«Roma»(Mieksika)
«Chałodnaja vajna» (Polšča)
«Pałajučyja» (Paŭdniovaja Kareja)
«Kryštal» byŭ u łonh-liście z 87 filmaŭ. U im taksama prysutničali stužka «Danbas» Siarhieja Łaźnicy, vyłučanaja Ukrainaj, i «Sabibor» Kanstancina Chabienskaha (Rasija).
Dadamo, što sumiesny biełaruska-rasijski film «Daroha» nie trapiŭ u šort-list u naminacyi «najlepšy dakumientalny film».
Kančatkovy šort-list ź piaci-šaści filmaŭ budzie nazvany 22 studzienia, uručeńnie 91-j premii «Oskar» adbudziecca 24 lutaha.