Źniščana znakamitaja viarba na ŭvachodzie ŭ park Horkaha ŭ Minsku
Volha Čakułajeva, facebook.com/olga.chekulaeva.3
U minskim parku Horkaha źniščyli znakamituju viarbu na centralnym uvachodzie. Razhalistaje dreva niekalki dziesiacihodździaŭ sustrakała naviedvalnikaŭ parka i było adnoj ź jaho vizitovak. Fotazdymki taho, jak pradstaŭniki «Zielanbuda» piłujuć i vyvoziać viarbu, apublikavała ŭ «Fejsbuku» Volha Čakułajeva, piša Jeŭraradyjo.
Načalnik Centralnaha dziciačaha parku imia Horkaha Rusłan Kasievič raspavioŭ Jeŭraradyjo, što dla viarby nie było inšaha losu, akramia vyrubki:
«Dreva pryjšło ŭ niepryhodnaść. Jość akt abśledavańnia z Centralnaha bataničnaha sada Nacyjanalnaj akademii navuk Biełarusi. Na drevie jość hnil i paškodžańni, a dva tydni tamu abvaliłasia vielizarnaja halina. Viarba pradstaŭlała niebiaśpieku dla naviedvalnikaŭ parka».
Pa słovach čynoŭnika, zamiest viarby praduhledžany kampiensacyjnyja pasadki. Budzie hetaje nievialikaje maładoje dreva ci pierasadžanaje darosłaje — pakul nieviadoma.
Lidar hramadskaj inicyjatyvy «Haradski laśničy» Ihar Korzun paćvierdziŭ Jeŭraradyjo, što viarba mahła być chvoraj. «Ale jość vialikaje pytańnie: ci dahladali hetaje dreva naležnym čynam? Pobač vialikaja daroha [vaśmipałosny praśpiekt Niezaležnaści. — Jeŭraradyjo] — całkam vierahodna, što dreva mahło zachvareć, — raspaviadaje Ihar Korzun. — I jašče adno pytańnie: što źjavicca na miescy śpiłavanaha dreva? Bo kali tam źjavicca niejki tonki dubčyk, dyk jaki ŭ hetym sens?»