Lenta.ru: Biełaruskija ŭłady i ŭ traktoŭkach historyi imknucca dystancyjavacca ad Rasii
Čarhovy materyjał na biełaruskuju tematyku źjaviŭsia na papularnym rasijskim sajcie Lenta.ru. Uładzimir Zotaŭ, jaki źjaŭlajecca stałym aŭtaram šavinistyčnych sajtaŭ Regnum i EurAsia Daily, praanalizavaŭ, jak źmianiajecca palityka biełaruskaj dziaržavy ŭ dačynieńni da histaryčnaj pamiaci na prykładzie Druhoj suśvietnaj vajny.
Aŭtar pryznaje, što ŭ Biełarusi nikoli nie sprabavali pierapisać vyniki toj vajny, ale padziei apošnich hadoŭ śviedčać ab tym, što biełaruskija ŭłady ŭsialak u hetym pytańni imknucca dystancyjavacca ad Rasii.
Zotaŭ źviartaje ŭvahu na prablemy z arhanizacyjaj «Nieśmiarotnaha pałka» ŭ Minsku, adsutnaść paŭnavartasnaha vajskovaha parada 9 Maja ŭ Minsku, a taksama nieadnaznačnaje staŭleńnie dziaržavy da hieorhijeŭskaj stužki. Aŭtar uzhadvaje historyju ŭ Słucku, kali miascovy ideołah źniała sa školnicy čorna-aranžavuju stužku.
Nie padabajecca Zotavu i toje, što haradskaja administracyja dazvoliła pravieści «Nieśmiarotny połk» arhanizacyi «Ruś mołodaja» — na dumku aŭtara, hetaja arhanizacyja źjaŭlajecca praŭładnaj.
Čytajcie taksama: Sietka: jak Rasija stvaraje ŭ Biełarusi rehijanalnyja sajty na bazie aŭtaraŭ z «Rumoła» i NODa
«Aficyjnaja biełaruskaja histaryčnaja navuka, niahledziačy na imklivy nacyjanalistyčny nachił, da hetaha času zachoŭvaje mnostva savieckich rudymientaŭ. Jana znachodzicca ŭ krychu dvaistym stanoviščy: z adnaho boku, ad jaje patrabujecca histaryčna abhruntavać nieabchodnaść isnavańnia asobnaj biełaruskaj dziaržavy, ź inšaha — ułada pakul jašče nie dała kančatkovaje dabro na pierachod da «nacyjanalnaj historyi» pa ŭkrainskim uzory, što istotna ŭskładniaje spravu»,
— razvažaje Lenta.ru.
Aŭtar kpić z nacyjanalnaha «apazicyjnaha» biełaruskaha pohladu na historyju, aburajecca, što takich «apazicyjnych» knih poŭna ŭ biełaruskich kniharniach, ale pryznaje, što «aficyjnaja» biełaruskaja historyja pakul dalokaja ad «nacyjanalistyčnych» uzoraŭ. Chacia pohlad na vajnu Rasii z Napaleonam 1812 hoda ŭ «aficyjnych» i «nacyjanalistyčnych» historykaŭ supadaje.
Ale aŭtar supakojvaje svaich čytačoŭ — ničoha strašnaha niama. Biełaruskaja dziaržava ŭsiaho tolki imkniecca akreślić svaju asablivuju rolu.
«I dobra, kali z časam uśviedamleńnie hetaj asablivaj roli nie pieratvorycca ŭ stvareńnie całkam inšaj traktoŭki tych padziej. Jak heta było, naprykład, va Ukrainie»,
— reziumuje Lenta.ru.