Litva hałasuje suprać papulistaŭ
U niadzielu ŭ Litvie prajšoŭ druhi tur parlamenckich vybaraŭ. Pieramohu atrymaŭ kanservatyŭny «Sajuz Ajčyny» byłoha premjer‑ministra Andrusa Kubilusa. Pavodle papiaredniaj infarmacyi chadeki atrymajuć u Sojmie 44 miescy z 141.
U niadzielu ŭ Litvie prajšoŭ druhi tur parlamenckich vybaraŭ. Pavodle infarmacyi staršyni CVK Zianonasa Vajhaŭskasa, u druhim tury vybaraŭ udzieł uziali 22% vybarcaŭ. Hałasavańnie prachodziła ŭ adnamandatnych akruhach.
U vyniku pieramohu atrymaŭ kanservatyŭny «Sajuz Ajčyny» byłoha premjer‑ministra Andrusa Kubilusa. Pavodle papiaredniaj infarmacyi chadeki atrymajuć u Sojmie 44 miescy z 141.
Na druhoje miesca vyjšli sacyjał‑demakraty, jaki znachodziacca ŭ kiroŭnaj elicie Litvy ŭžo siem hadoŭ, byłoha prezydenta Alhirdasa Brazaŭskasa i siońniašniaha premjera Hiedyminasa Kirkiłasa (26 miescaŭ).
Šasnaccać mandataŭ u parlament atrymałasia zavajavać niadaŭna ŭtvoranaj Partyi narodnaha adradžeńnia, 41‑hadovaha televiadučaha Arturasa Valinskasa. Nahadajem, što ŭ skład partyi uvajšli viadomyja ŭ krainie pradstaŭniki šoŭ‑bizu. Cikava, što sam Valinskas prajhraŭ vybary ŭ Paniaviežisie kanservataru Antanasu Matułasu.
Partyja byłoha kiraŭnika krainy papulista Rałandasa Paksasa zmahła zavajavać piatnaccać miescaŭ u Sojmie. Jašče adna prarasiejskaja siła Partyja pracy multymiljanera rasiejskaha pachodžańnia Viktara Ŭspaskich zmahła zdabyć dziesiać mandataŭ.
Adzinaccać mandataŭ atrymaŭ ruch liberałaŭ, a jašče vosiem — liberał‑centrystaŭ. Pradstaŭnictva inšych partyi ŭ Sojmie budzie minimalnym.
Nie prajšła ŭ parlament dosyć viadomaja ŭ krainie staršyńka partyi viaskoŭcaŭ i novaj demakratyi Kazimira Prunskienie. Nahadajem, što ŭ 2004 hodzie na daterminovych prezydenckich vybarach, paśla impičmentu Paksasa, Pruskienie zmahła nabrać 47,8% hałasoŭ vybarcaŭ i zusim niaznačna sastupiła Vałdasu Adamkusu.
Nia zmoh vyjhrać vybary ŭ adnamantatnaj akruzie były mer Vilni Arturas Zuokas. Zrešty, jon u parlament prachodzić pa partyjnych śpisach liberałaŭ.
Adrazu ŭ čatyroch akruhach budzie praviedzieny pierapadlik hałasoŭ. Heta tyja akruhi, dzie roźnica pamiž kandydatami skłała ad 22 da 52 hałasoŭ.
Vidavočna, što parlamenckuju kaalicyju składuć pradstaŭniki čatyroch pravacentrysckich partyj — «Sajuz Ajčyny», Partyja narodnaha adradžeńnia, ruch liberałaŭ i liberał-centrysty. Jany buduć u Sojmie 79 pradstaŭnikoŭ, kali ničoha niečakanaha nie adbudziecca padčas pierapadliku.